Azərbaycanda cinayətlərin üçdə biri mülkiyyət əleyhinə törədilir

Şənbə günü DİN-in mülkiyyət əleyhinə və ailə-məişət zəminində törədilən cinayətlərlə bağlı kollegiya iclası keçirilib.

DİN-in Baş Cinayət Axtarışı İdarəsinin rəisi Emin Şəkinski bildirib ki, 2015-ci ilin ilk beş ayında 55 oğurluq, 6 quldurluq, 2 dələduzluq, 5 soyğunçuluq, 1 əmlakı qəsdən məhv etmə və sair cinayətlər “isti izlərlə” açılıb, axtarışda olan 152 avtomobil saxlanılıb, avtomatlaşdırılmış kriminalistik uçotlar vasitəsilə 174 cinayət açılıb.

Mühafizə olunan obyektlərin sayın 165, mənzillərin sayı isə 354 vahid artıb. 191 obyektdə oğurluq faktlarının qarşısı alınaraq 78 nəfər yaxalanıb.  

2014-cü ildə və cari ilin ötən dövründə mülkiyyət əleyhinə cinayətlər törətmiş 1810 nəfərdən ibarət 657 qrup və mütəşəkkil dəstə, o cümlədən mənzillərdən oğurluq etmiş 251 nəfərdən ibarət 85 qrup zərərsizləşdirilib. Mülkiyyət əleyhinə olan 7986 cinayətin açılması təmin olunub, 4581 nəfər məsuliyyətə cəlb edilib, habelə axtarışa elan olunmuş 1292 təqsirləndirilən şəxs tutulub. 

Bakı şəhərində və Abşeron rayonu ərazisində mənzillərdən 103 oğurluq cinayəti törətmiş Azərbaycan və Gürcüstan vətəndaşlarından ibarət qrup ifşa edilib.

Öz növbəsində, DİN-in Baş İctimai Təhlükəsizlik İdarəsinin rəisi Cavanşir Məmmədov bildirib ki, son il yarım ərzində respublika üzrə açılması təmin edilmiş qəsdən adam öldürmə və ona cəhdlərin 54,2 faizi, həmçinin  qəsdən sağlamlığa ağır və   az ağır zərər vurmaların 70,4 faizi ailə münaqişəsi zəminində törədilib.

Kollegiyanı yekunlaşdıran DİN rəhbəri Ramil Usubov qarşıda duran Avropa Oyunlarına toxunub, tabeliyindəkiləri digər hüquq-mühafizə orqanları ilə birlikdə yarışların yüksək təhlükəsizliyini təmin etməyə çağırıb. -06D-