ADP rəsmi Bakını diplomata təzyiqlərə son qoymağa çağırdı

Demokrat Partiyası İdarə Heyətinin bazar ertəsi keçirilən toplantısında ölkədə və beynəlxalq aləmdə baş verən hadisələr müzakirə olunub.

İdarə Heyəti I Avropa Oyunlarına az qalan bir müddətdə bəzi Avropa dövlətləri liderlərinin tədbirə qatılmayacaqları barədə bəyanatlarına diqqət çəkib. Bunun rəsmi Bakının ölkədə insan hüquq və azadlıqlarına məhəl qoymaması ilə bağlı olduğu vurğulanıb. Avropa Oyunlarının Azərbaycan dövləti üçün böyük əhəmiyyəti vurğulanıb və rəsmi Bakıya Avropa dövlətləri, beynəlxalq qurumların insan haqları, demokratiya ilə bağlı tələblərini yerinə yetirmək çağırışı edilib. Ölkədə vətəndaş hüquq və azadlıqlarının, söz, mətbuat özgürlüyünün qorunması, siyasi məhbus probleminin həlli, vətəndaş cəmiyyəti institutları üzərində qoyulan məhdudiyyətlərin aradan qaldırılması yönündə addımlar atılmasının vacibliyi vurğulanıb.

İdarə Heyəti “Beynəlxalq Avrasiya Hərəkatının” lideri, Kremlin qeyri-rəsmi sözçüsü Aleksandr Duqinin rəsmi Bakıya Dağlıq Qarabağ problemilə bağlı heç bir ilkin şərt qoymadan Avrasiya İttifaqına qoşulmaq üçün təhdidedici bəyanatına diqqət çəkib. Belə bəyanatların arxasında “Putin Rusiyası”nın postsovet məkanında müstəqillik əldə etmiş ölkələri yenidən işğal altına salmaq “planı” durması iddia edilib. İdarə Heyəti bəzi postsovet ölkələri kimi, Azərbaycanın da bir hissəsinin işğala məruz qaldığına diqqət çəkib. Bu işğalçı siyasəti durdurmaq üçün beynəlxalq ictimaiyyətə Rusiyanı işğalçı dövlət kimi tanımaq çağırışı edilib.

İdarə Heyəti ATƏT-in Layihələr Koordinatorunun Bakıda fəaliyyətinə son verilməsi, demokratik institutların fəaliyyətinin dayandırılmasından sonra ölkədə insan hüquq və azadlıqlarının pozulmasının intensiv xarakter almasından narahatlıq duyduğunu bəyan edib. ATƏT və AŞ qarşısında götürdüyü öhdəlikləri yerinə yetirmədiyi üçün rəsmi Bakıya bu qurumların yerli strukturlarının səlahiyyətlərini artırmaq çağırışı edilib.

İdarə Heyəti ölkə məmurları haqda sosial şəbəkələrdə tənqidi fikirlər bölüşdüyü üçün diplomat A.Məmmədovun çirkin kampaniyaya məruz qalmasını pisləyib. Toplantıda rəsmi Bakı ölkənin beynəlxalq aləmdə tanınması yönündə ciddi səylər göstərən diplomata qarşı yönələn təzyiqlərə son qoymağa çağırılıb. -05D-