Azərbaycanın işğal olunmuş ərazilərində qanunsuz iqtisadi fəaliyyətlə məşğul olanlara cinayət işi qaldırlıb

Azərbaycan Baş Prokurorluğu Azərbaycanın erməni silahlı qüvvələrinin nəzarətində olan ərazilərdə işləyən şirkətlərin rəhbərlərinə qarşı cinayət işi qaldırıb.

Baş Prokurorluğun mətbuat xidmətinin məlumatında deyilir ki, aparılmış araşdırmalarla İsveçrə, Bolqarıstan, Uruqvay, Argentina, Rumıniya və digər ölkələrin bir sıra şirkətlərinin, o cümlədən “Haik Watch and Jewelry Co”, “Rodino Haskovo” JIC, “Centro Ceibal”, “Deccan Gold Mines Ltd” və “Cosmote Romanian Mobile Telecommunications S.A” şirkətlərinin rəhbərlərinin 1999-2017-ci illərdə Azərbaycanın dövlət sərhəddini Ermənistan ərazisindən qanunsuz olaraq dəfələrlə keçmələrinə, işğal altındakı ərazilərdə olan digər şəxslərlə mütəşəkkil dəstə halında Xankəndi, Şuşa şəhərləri, Laçın, Kəlbəcər rayonları və digər yaşayış məntəqələrində müəssisələr yaradıb təbii sərvət və faydalı qazıntıların istismarı da daxil olmaqla, apardıqları fəaliyyətləri ilə külli miqdarda ziyan vurmalarına və qanunsuz gəlir əldə etmələrinə, habelə işğalın möhkəmləndirilməsinə və Azərbaycanın ərazi bütövlüyünün parçalanmasına yönələn hərəkətlər etmələrinə dair əsaslı şübhələr müəyyən edilib.

Həmin faktlar üzrə Azərbaycan Baş Prokurorluğunun Ağır Cinayətlərə dair İşlər üzrə İstintaq İdarəsində Cinayət Məcəlləsinin müvafiq maddələri ilə cinayət işi başlanmış, istintaq aparılır.

Mətbuat xidməti  bildirir ki, Baş Prokurorluq işğal altındakı ərazilərə qeyri-qanuni səfərlər etməklə qanunsuz iqtisadi fəaliyyətlə məşğul olan, habelə ölkənin ərazi bütövlüyünü şübhə altına alan şəxslərə qarşı zəruri tədbirləri bundan sonra da davam etdirəcək. -03D-