Azərbaycanlı cərrah Gürcüstanda saxlanılıb

Bakı /23.05.17/Turan: Gürcüstandakı "Lanset" klinikasının təsisçilərindən olan Fərman Ceyranlı mayın 22-də dələduzluqda şübhəli bilinərək saxlanılıb.

Gürcüstan hüquq- mühafizə orqanlarından Turan-a F.Ceyranlının saxlanıldığını təsdiqləyiblər. Hələlik ona qarşı rəsmi ittiham irəli sürülməyib. Hüquq- mühafizə orqanlarından bildiriblər ki,

F.Ceyranlı klinikanın başqa rəsmiləri ilə birlikdə qanunsuz transplantasiya əməliyyatında şübhəli bilinirlər.

F.Ceyranlı Tbilisi Baş Polis İdarəsinin müvəqqəti saxlama təcridxanasında saxlanılır.

Fərman Ceyranlı əslən Gürcüstandandır. 1980-ci ildə Bakıda N.Nərimanov adına Azərbaycan Dövlət Tibb İnstitutunu bitirib. Həmin vaxtdan 1 saylı Tbilisi şəhər klinik xəstəxanasında cərrahiyyə üzrə internatura keçib.

1982- 1992-ci illərdə Seçenov adına Moskva Tibb Akademiyasının cərrahi xəstəliklər kafedrasında baş laborantdan tutmuş şöbə müdirinə kimi fəaliyyət göstərib.

1993-cü ildə Azərbaycan Səhiyyə Nazirliyində Elm İdarəsinin rəisi, 1994-cü ildə M.Topçubaşov adına Elmi Cərrahlıq Mərkəzinin direktor müavini, 1995-ci ildən isə həmin mərkəzin direktoru vəzifələrində çalışıb. Eyni zamanda Səhiyyə Nazirliyinin baş cərrahı olub. Sonradan səhiyyə naziri Əli İnsanovla münasibətləri yaxşı olmayıb və o, Azərbaycan tərk edib.

Bir neçə il öncə Gürcüstanda "Lanset" klinikasını təsis edib.-0--