Azərbaycanlı əlil oğlan Zelenoqradda döyüldükdən sonra kor olub

Azərbaycanın Moskvadakı səfirliyinin əməkdaşları Zelenoqradda avtobusda döyüldükdən sonra demək olar ki, kor olan 14 yaşlı Azərbaycanlı əlil oğlanla görüşüb.

“Səfirlik (Azərbaycan) əməkdaşlar zərərçəkmiş həmvətənlərini Morozovski uşaq xəstəxanasında tapıblar. O, beyin silkələnməsi və göz travması ilə bu xəstəxanaya yerləşdirilib. O, görmə əlilidir. Onunla söhbət aparılıb, hadisənin təfsilatı araşdırılıb”, deyə səfirliyin mətbuat xidmətinin məlumatında bildirilir.

Oğlanın anası bildirib ki, “hücum və xəsarət yetirilməsi nəticəsində oğlunun onsuz da zəif olan görməsi daha da pisləşərək, 1%-ə qədər düşüb ki, bu da görmənin tam itirilməsinə bərabərdir”.

“Səfirin göstərişi ilə Azərbaycan XİN nümayəndəsi operativ olaraq Rusiya DİN-dəki həmkarları ilə əlaqə saxlayıb və onları məlumatlandırıb”, deyə mətbuat xidməti bildirir.

Oğlan noyabrın 2-də Moskva yaxınlığında sərxoş tərəfindən döyülüb. Şahidlərin sözlərinə görə, 25 yaşlı gənc qeyri-slavyan görünüşlü oğlanın ünvanına senzuradankənar ifadələr işlədib, bütün miqrantların Rusiyadan qovulmalı olduğunu qışqırıb.

Sonradan aydın olub ki, zərərçəkmiş azərbaycanlıdır, onun ailəsi 10 ildir Zelenoqradda yaşayır. Bundan başqa, o, əlildir və korreksiya məktəbinə gedir. Gənc qaçmaq və ya qorunmaq imkanı olmayan yeniyetməni döyməyə başlayıb. Şahid qadın ondan dayanmağı xahiş edib və ətrafdakıları köməyə çağırıb, lakin heç kim kömək etməyib. Xoşbəxtlikdən avtobus növbətçi polislərin yanında dayanıb və onlar münaqişəyə müdaxilə ediblər.

Xuliqan saxlanıldıqda o, polislərlə, habelə döydüyü yeniyetmə ilə “razılaşmağa” çalışıb. Cəhdləri uğursuzluqla nəticələndikdə o, oğlanın özünün davaya girdiyini iddia edib. -02В-