Azərbaycanlı idmançılar Avropa Oyunlarında daha üç qızıl medal qazanıblar

  Çərşənbə günü Avropa Oyunlarında azərbaycanlı idmançılar daha 4 medal –  3 qızıl və 1 bürünc medal qazanıblar.

İyunun 17-də birinci qızıl medalı sərbəst güləşçi, London olimpiadasının çempionu Toğrul  Əsgərov (65 kq.) qazanıb. Finalda o, italiyalı rəqibi Frank Çamizoya qalib gəlib.

London olimpiadasının bürünc mükafatçısı Xetaq Qazyunov da sərbəst güəşçilər arasında (95 kq.) birinci yeri tutub. Finalda o, gürcüstanlı  Elizbar İdikadzeyə qalib gəlib.

Azərbaycanın daha bir nümayəndəsi, sərbəst güləşçi Cəbrayıl Həsənov (74 kq.) bürünc mükafata sahib olub.

İyunun 17-də üçüncü qızıl medalı taekvandoçu Ayxan Tağızadə qazanıb. O, final görüşündə Polşa təmsilçisi Karol Robakı məğlub edib.

Beş gün davam edən yarışların nəticələrinə əsasən  Azərbaycan medalların sayına görə ikinci yerdədir. Azərbayanın aktivində 23 medal (11 qızıl, 3 gümüş, 9 bürünc) var.

Birinci yerdə 29 medalla (16-5-8) Rusiyadır.  Macarıstan 13 medalla  (7-1-5) üçüncü yerdədir.—06D--