Azərbaycanlı jurnalistlərin böyük bir qrupu “Abzas Media”ya təzyiqləri pisləyib

Bakı/21.11.23/Turan: Azərbaycan jurnalistlərinin böyük bir qrupu “Abzas Media” rəhbərlərinin – Ülvi Həsənli və Sevinc Vaqifqızı, eləcə də bu nəşrlə əməkdaşlıq edən fəal Məhəmməd Kekalova qarşı cinayət təqibini pisləyən bəyanatla çıxış edib.

“Azərbaycanda uzun illlərdir ki, söz və ifadə azadlığı siyasi hakimiyyətin amansız repressiyaları və təhdidi altındadır”, - jurnalistlərin bəyanatında deyilir.

Azərbaycan faktiki olaraq Konstitusiyada müəyyən edilən fundamental hüquq və azadlıqlara, qoşulduğu konvensiyalara və götürdüyü öhdəliklərə qarşı çıxan bir ölkəyə çevrilib.

2021-ci ildən isə davamlı olaraq məhv edilmiş Azərbaycan mediasının az sayda fəaliyyət göstərən nümunələrinin də tamamilə sıradan çıxarılması siyasəti yürüdülür.

Buna 2021-c ildə qəbul edilmiş mürtəce "Media haqqında" qanunu və qanunvericiliyə gətirilən çoxsaylı hüquqazidd normaları, həmçinin söz azadlığına qarşı amansız davranışları misal göstərmək olar.

Azərbaycanda fəaliyyət göstərən və hakimiyyətin korrupsiya əməllərini araşdıran müstəqil media orqanı "Abzas Media"ya qarşı noyabrın 20-də başlanan basqılar da siyasi sistemin azad mətbuata qəddar münasibətinin ifadəsidir.

Nəşrin direktoru və baş redaktoru Ülvi Həsənli və Sevinc Vaqifqızı uydurma qaçaqmalçılıq ittihamı ilə saxlanılıb.

Həmçinin nəşr ilə əməkdaşlıq edən ictimai fəal Məhəmməd Kekalov saxlanılıb və bir sutkadan çoxdur ki, harada olması barədə məlumat verilmir.

Bəyanat müəllifləri “Abzas Media”ya qarşı ittihamları gülünc hesab edir və Azərbaycan hakimiyyətini saxta ittihamlarla təqiblərə son qoymağa, saxlanılanları azad etməyə çağırır.

Müəlliflər Azərbaycanın üzv olduğu beynəlxalq təşkilatları mətbuat azadlığına qarşı qanunsuz və repressiv hərəkətlərə son qoyulması üçün əməli addımlar atmağa çağırıblar.

Bəyanatı Turan Agentliyi, onlayn nəşrləri - Argument.az, Toplum TV, Meydan.TV, "Basta", RLC kanalı,  Avasor TV, Sancaq TV, "Az24saat.org", “Azadlıq” qəzeti, Kanal-13, OV-Media, TİME TV-ni təmsil edən 50-yə yaxın jurnalist, həmçinin frilanserlər qrupu imzalayıb –0D06-