Ermənistan Xarici İşlər Nazirliyi: Sülh müqaviləsi üzrə altıncı təklif Bakıya təqdim edilib

Bakı/21.11.23/Turan:  Ermənistan sülh müqaviləsinin bağlanması ilə bağlı altıncı təklifi Azərbaycana təqdim edib. Bu barədə noyabrın 21-də Ermənistan Xarici İşlər Nazirliyi bildirib.

«Ermənistan münasibətlərin normallaşdırılması haqqında sənədin əvvəllər elan edilmiş prinsiplər əsasında bağlanmasına və imzalanmasına əvvəlkitək sadiqdir",- nazirlik bildirib.

Çərşənbə axşamı Ermənistan parlamentinin vitse-spikeri Akop Arşakyan bildirib ki, Bakı və Yerevan arasında sülh müqaviləsinin müxtəlif layihələri üzrə mübadilə aparılır. "Təkliflər sənədi Yerevana daxil olur, Yerevandan isə təkliflərlə Bakıya göndərilir", - Arşakyan jurnaistlərlə söhbətində deyib.

Xatırladaq ki, sentyabrın 11-də Bakı sülh müqaviləsi üzrə təkliflərin 5-ci variantını göndərib. Yerevan ona indi cavab verib. Tərəflər sülh müqaviləsinə dair təkliflər və variantların məzmunu barədə məlumat vermirlər.

Oktyabrın 30-da Ermənistanın baş naziri Nikol Paşinyan bildirib ki, tərəflər sülh sazişinin üç əsas prinsipini razılaşdırıblar: tərəflərin Ermənistan ərazisinin 29,8 min kvadrat  kilometr, Azərbaycanın isə 86,6 min kvadrat  kilometr olmasına əsaslanaraq bir-birinin ərazi bütövlüyünü tanıması.

İkinci prinsip ondan ibarətdir ki, 1991-ci il Alma-Ata bəyannaməsi dövlət sərhədinin delimitasiyası və gələcək demarkasiyası üçün siyasi əsas olmalıdır.

Üçüncü prinsip suverenliyə qarşılıqlı hörmət əsasında bütün regional kommunikasiyaların açılmasıdır.

Rəsmi Bakı bu bəyanatı şərh etməyib.02D