Bakı sakini haqsızlığın qurbanı olub

Bakı sakini Veronika Tarbayeva “Press-köşk”ün əlindən qanunsuz alınması ilə bağlı çərşənbə axşamı RATİ-də mətbuat konfransı keçirib.  

V.Tarbayeva 2012-ci ilin yayında metronun “Neftçilər” stansiyanın yaxınlığında Nizmai rayon icra hakimiyyətinin qərarı ilə “Press-köşk” qoyulmasına nail olub. Amma həmin il sentyabrın 5-i gecə adı çəkilən köşkü oradan götürüblər.

V.Tarbayeva köşkü Bakı şəhər ticarət xidməti departamentinin götürdüyünü bildirir. Onun sözlərinə görə, köşkün götürülməsinin aylıq haqqın 1500 manata qaldırılması ilə əlaqədar olub. Belə ki, Nizami rayonu üzrə adı çəkilən köşklərdən haqları yığan Nizami Quliyev avqust ayında 1000 manat tələb edib. Sentyabr ayında isə aylıq haqq 1500 manata qaldırılıb. V.Tarbayeva aylıq haqqın qaldırılmasının səbəbini öyrənmək istədikdə, həm də ödədiyi haqqa görə qəbz tələb etdikdə N.Quliyev hər-hansı qəbz verilməyəciyini deyib. Sentyabrın 5-i gecə köşk götürülüb. V.Tarbayeva köşkü götürülən zaman onun içində 11 min manatdan artıq mal olduğunu nəzərə çatdırıb. 

Baş vermiş hadisə ilə bağlı 24 saylı polis bölməsinə müraciət edilib, polis bölməsi bu işi görənlərin arxasında güclü adamların durduğunu bəhanə edərək, heç bir tədbir görməyib. Daha sonra rayon prokurorluğuna müraciət olunub. Prokurorluq isə qadına məhkəməyə müraciət etməyi məsləhət görüb. Rayon məhkəməsi iş cinayət xarakterli olduğuna görə polisə müraciət olunmasını təklif edib. Qadının Bakı şəhər prokurorluğuna müraciəti də nəticəsiz qalıb. 

Bundan sonra V.Tarbayeva Bakı şəhər icra hakimiyyəti ticarət xidməti deprtamentinin rəisi Ramiz Hacıyevlə görüşüb. Bu görüşdə R.Hacıyev V.Tarbayevaya ayda 300 manat verməklə qadına dəyən ziyanı ödəmək fikrində olduğunu deyib. Amma qadın ona məxsus köşkün qaytarılmasında israr edib. 

“Müraciət etmədiyim instansiya qalmayıb, ən yüksək səviyyəyə qədər müraciətlərim olub, amma nəticə yoxdur”, - deyə zərəçəkən bildirib. Ən başlıcası, qadına köşkün niyə götürülməsi haqda hər-hansı açıqlama verilmir.

Ən son olaraq V.Tarbayeva mülkiyyət hüququnun pozulması ilə bağlı bu günlərdə Konstitusiya məhkəməsinə müraciət edib. Özünün onkoloji xəstə olduğunu deyən V.Tarbayeva bu köşkdən gələn gəlirlə ailəsini dolandırdığını və dərman pulunu əldə etdiyini nəzərə çatdırıb. -05C-