Bakıda ali məktəb məzunlarının işlə təmin edilməsi problemi müzakirə olunub

Çərşənbə axşamı Bakıda Four Seasons otelində “Ali məktəb məzunlarının işə düzəldilməsinin artırılması” mövzusunda forum keçirilib.

Tədbir Britaniyanın British Council təşkilatı tərəfindən Azərbaycan Təhsil Nazirliyinin dəstəyilə keçirilib.

“Bütün dünyada universitetlərin ən aktual problemlərindən biri məzunların işlə təmin olunmasıdır”, - British Council Azərbaycan üzrə direktoru Elizabet Vayt forumun açılışında bildirib. 

O qeyd edib ki, 2014-cü ildən keçirilən belə forumlar işəgötürənlərlə ali məktəblər arasında yaxşı əlaqə yaratmalıdır ki, məzunları ixtisas üzrə işlə təmin etmək mümkün olsun.

Araşdırmalar göstərir ki, Azərbaycan iki problemlə üzləşir: təhsilin keyfiyyətinin yüksək olmaması və məzunların ixrisas üzrə işlə təmin edilməsi.

“Lester” Universitetinin professoru Rajeş Pateli bu sahədə Britaniya təcrübəsini bölüşüb. O deyib ki, Britaniyanın ali məktəbləri öz məzunlarının ixtisas üzrə iş əldə etməsinə zəmanət verməyə çalışır. Bundan ötrü potensial işəgötürənlərlə xüsusi münasibətlər qurulur.

Təhsil Nazirliyinin sektor müdiri Sülhəddin Gözəlov bildirib ki, ali məktəblərin reytinqinin müəyyən edilməsi, bu məsələnin həllinə kömək edəcək. Bu metodikanın meyarlarından biri konkret ali məktəbin məzunlarının məşğulluğunun təmin edilməsi olacaq.—0—