Bakıda bir nəfər donaraq ölüb

Bakı sakini Mişakkiyeva Tatyana Nikolayevna (1963-cü il) donmadan ölüb. Onun cəsədi Xanlar küçəsi, 24-də aşkarlanıb. Bu barədə Səbayel Rayon Polis İdarəsi məlumat verib. Faktla bağlı araşdırma aparılır. 

Eyni zamanda Əmək və Əhalinin Sosial Müdafiəsi Nazirliyi bildirib ki, Bakının rayonlarında və Sumqayıt şəhərində təşkil edilmiş müvəqqəti sığınacaqlara bu günədək 420 nəfər müraciət edib.

Xətai rayonunda 71, Nərimanov rayonunda 130, Nəsimi rayonunda 75, Nizami rayonunda 50, Yasamal rayonunda 34, Sumqayıt şəhərində isə 60 nəfər kəskin hava şəraitindən qorunmaq üçün sığınacaqlardan istifadə edib.

Sığınacaqlarda olduqları müddətdə həmin insanlar 24 saat ərzində yataqla, istiliklə, gün ərzində 3 dəfə isti qidalarla, lazım olduqda tibbi xidmətlə təmin olunublar. Onların böyük əksəriyyətini açıq havada səyyar işləyənlər və rayonlardan müvəqqəti olaraq Bakıya gələrək yenidən öz rayonlarına qayıtmaqda çətinlik çəkənlər təşkil edib.

Bu arada Ekologiya və Təbii Sərvətlər Nazirliyinin Milli Hidrometeorologiya Departamenti bildirir ki, Bakıda və Abşeron yarımadasında şaxtalı hava şəraiti fevralın 7-dək davam edəcək. 

Havanın temperaturu gecə 4-8 dərəcə şaxta, gündüz saatlarında isə 2 dərəcə şaxtadan 2 dərəcəyədək isti təşkil edəcək. Bu müddətdə əsasən yağmursuz hava şəraitinin üstünlüyü gözlənilir. Ancaq şaxtalı hava şəraiti isə davam edəcək.-16D-