Bakıda hava şəraitinin küləkli olacağı proqnozlaşdırılır

Cümə axşamı, mayın 23-də Bakıda və Abşeron yarımadasında hava şəraitinin dəyişkən buludlu, arabir tutqun olacağı gözlənilir. Gecə və səhər yarımadanın bəzi hissələrində qısamüddətli yağışlar yağa bilər. Mülayim şimal-şərq küləyi üstünlük təşkil edəcək.

Havanın temperaturu gecə 12-16 dərəcə isti, gündüz 21-26 dərəcə isti təşkil edəcək, xəbəri Milli Hidrometeorologiya Xidməti yayıb.

Azərbaycanın rayonlarında hava şəraitinin əsasən yağmursuz keçəcəyi gözlənilir, lakin bəzi dağlıq və dağətəyi rayonlarda vaxtaşırı yağış yağacağı, ayrı-ayrı yerlərdə intensiv xarakterli olacağı gözlənilir. Şimşək çaxacağı, dolu düşəcəyi, dağlıq ərazilərə qar yağacağı ehtimalı var. Mülayim şərq küləyi üstünlük təşkil edəcək.

Havanın temperaturu gecə 10-15 dərəcə, gündüz 22-27 dərəcə təşkil edəcək.

Dağlarda gecə 3-8 dərəcə isti, gündüz 12-17 dərəcə isti olacağı gözlənilir.