Bakıdakı Heydər Əliyev Hava Limanı COP29 konfransı zamanı sərnişinlərə yol hərəkətinə dair dəyişikliklər barədə xəbərdarlıq edir

Heydər Əliyev Beynəlxalq Hava Limanına səyahət edən sərnişinlərə COP29 konfransı zamanı şəhər mərkəzində tətbiq edilən yol məhdudiyyətləri ilə əlaqədar alternativ marşrutlardan və ictimai nəqliyyatdan istifadə etmələri tövsiyə olunur.

Şəhər mərkəzindən hava limanına gedən sürücülərə Zığ şossesindən istifadə etmələri məsləhət görülür. Bilgəh və Maştağa istiqamətindən gələnlər isə Mərdəkan və Şüvəlan qəsəbələrindən keçərək Zığ şossesinə çıxan marşrutu seçə bilərlər.

COP29 tədbiri zamanı sərnişinlərin rahatlığı üçün H1 və H2 ekspress avtobusları fasiləsiz fəaliyyət göstərəcək. H1 avtobusu "28 May" metro stansiyasından hər 10 dəqiqədən bir, H2 avtobusu isə "Əhmədli" metro stansiyasından hər 15 dəqiqədən bir yola düşəcək. Qeyd edək ki, bu marşrutlar üzrə gediş haqqı 14 noyabra qədər pulsuz olacaq.

Mümkün yol hərəkəti məhdudiyyətləri nəzərə alınaraq, sərnişinlərə uçuşdan ən azı üç saat əvvəl hava limanına gəlmələri tövsiyə edilir.

14 noyabra qədər Bakı Hava Limanının qarşısındakı dayanacaq zonası xüsusi təyinatlı avtomobillər üçün nəzərdə tutulub və şəxsi avtomobillərin burada dayanmasına icazə verilmir. Yalnız sərnişinlərin düşməsi və mindirilməsi mümkündür. Həmçinin, 1 və 2-ci Terminallara yalnız aviabiletləri olan sərnişinlər buraxılır, yola salan və qarşılayan şəxslərdən hava limanına gəlməmələri xahiş olunur.