Baş Prokurorluq çinar budağının qopmasının səbəbləri barədə

Bakı/15.07.19/Turan: Baş Prokurorluq iyulun 14-də Şəkidə çinar ağacının budağının qopmasının səbəblərinin araşdırılmasının ilkin nəticələri barədə açıqlama yayıb. Hadisə nəticəsində 19 nəfər xəsarət alıb.

Baş Prokurorluğun mətbuat xidmətinin məlumatında deyilir ki, müəyyən edilib ki, hündürlüyü 34 metr olan ağacın 21 metr hündürlükdə yerləşən 50 metr diametrli budağı qəflətən qoparaq aşağıda 17 metr hündürlükdə olan nisbətən kiçik diametrli budağı da qıraraq hər iki budaq insanların üzərinə düşüb.

Məlumatda mütəxəssislərə istinadən budaqların qırılmasına dair ilkin rəydə səbəb kimi əlverişsiz hava şəraiti göstərilir.

Belə ki, iyulun 12-dən külək əsib, vaxtaşırı yağışla müşayiət olunub. İyulun 14-də səhər saatlarından başlayaraq 3 saat ərzində aramsız yağış yağıb. Bu müddətdə aylıq yağıntı normasının 54%-i (32 sm.) yağıb.

İlkin məlumatlara əsasən müəyyən edilib ki, qırılmış əsas budaq sağlam olub, qurumağa və hansısa fiziki təsirlərə məruz qalmayıb.

Ekologiya və Təbii Sərvətlər Nazirliyinin mütəxəssislərinin iştirakı ilə budaqlardan nümunələr götürülərək məhkəmə-bioloji və məhkəmə-trasoloji ekspertizaları təyin edilib, ekspertizaların keçirilməsi Ədliyyə Nazirliyinin Məhkəmə Ekspertizası Mərkəzinə həvalə olunub, araşdırmalar davam etdirilir.06D-