Bayram Məmmədovun cinayət işi üzrə məhkəmənin hazırlıq iclası keçirilib

Noyabrın 4-də Bakı Ağır Cinayətlər Məhkəməsində hakim Eynulla Vəliyevin sədrliyi ilə NİDA Vətəndaş Hərəkatının həbsdə olan üzvü Bayram Məmmədovun cinayət işi üzrə məhkəmənin hazırlıq iclası keçirilib.

NİDA Vətəndaş Hərəkatının üzvi B.Məmmədov və Q.İbrahimov mayın 10-u saxlanıblar. Mayın 12-də Xətai Rayon Məhkəməsi onlar barəsində həbs qətimkan tədbiri seçib. Daxili İşlər Nazirliyinin (DİN) həbs edilən NİDA-çı gənclərlə bağlı yaydığı məlumatda bildirilir ki, hər iki gənc narkotik maddəylə əlaqəli saxlanılıb.

Hər iki gənc ittihamı qəbul etmir və  həbslərini siyasi sifariş hesab edir.

Gənclərin keçmiş prezident Heydər Əliyevin abidəsinə şüar yazılmasına görə həbs edildiyi güman edilir.

Gənclər həbsdən sonra narkotik ittihamını ağır işgəncə altında imzaladıqlarını bildiriblər.

Vəkil Elçin Sadıqov cinayət işinə xitam verilməsi, həbs qətimkan tədbirinin ev dustaqlığı ilə əvəz edilməsi, gəncin işgəncə altında qəbul etdiyi sübutların cinayət işindən çıxarılması, Bayram Məmmədovda narkotik maddə olması və satışı ilə bağlı Bakı şəhər Baş Polis İdarəsinə daxil olan əməliyyat məlumatının qeyd olunduğu kitabın sübut kimi məhkəməyə gətirilməsi, dövlət tərəfindən təyin edilmiş vəkilin iş qrafikinin vəkilin işlədiyi hüquq məsləhətxanasından məhkəməyə göndərilməsi, hal şahidlərinin digər eyni məzmunlu işlərlə bağlı da hal şahidliyi etməsi barədə məlumatların dəqiqləşdirilməsi barədə vəsatətlər qaldırıb.

“Bayram Məmmədovun əməlində hər hansı  cinayət tərkibi  yoxdur. O, işgəncə altında ittihamı qəbul edib. İttihamla bağlı cinayət işində hər hansı  sübut yoxdur. Onun müdafiə hüququ ciddi pozulub”, deyə vəkil qeyd edib.

Dövlət ittihamçısı Ramin Nağdəliyev vəsatətlərin təmin edilməməsini istəyib və məhkəmə heç bir vəsatəti təmin etməyib.

Hakim cinayət işinin məhkəmə baxışına verilməsi barədə qərar qəbul edib. Cinayət işinin məhkəmə  baxışı noyabrın 11-də saat 10.30 başlayacaq.

Bugünki məhkəmə iclasında iştirak edən Bayram Məmmədov sağlam və şən görünüb. Yalnız gözlərində problem yarandığını deyib.

O, dostlarından çoxsaylı elmi və bədii kitabların gətirilməsini xahiş edib.

Məhkəmədə maraqlı məqamlar da olub.

Hakim məhkəmə zalına daxil olan zaman prosesi izləyənlərin gülüş səsini eşidib. “Bura məhkəmə zalıdır. Teatra gedib orada gülmək olar. Məhkəmə zalında qaydalara əməl etmək lazımdır”. 

Hakim zaldakılara xəbərdarlıq edib ki, qaydalara əməl etməyənləri 2 sutka inizbati həbs və ya cərimə gözləyir.

Bayram Məmmədov ittiham aktını almadığını deyib, bu zaman hakim onun aktı alması ilə bağlı imzasını göstərib.  

Bayram Məmmədov ilk öncə hakimə sualının olduğunu deyib. Hakim ona sual vermək hüququnun olmadığını xatırlatdıqda,  etirazının olduğunu bildirib.

“Mənim etirazım dövlət sisteminə və İlham Əliyevədir. Bura məhkəmə zalı yox, tamaşa zalıdır. Ssenari də indidən hazırdır. Quruluşçu rejissor İlham Əliyevdir”. Hakim bu zaman Məmmədova “artıq-əskik danışmaq lazım deyil” xəbərdalığını edərək, çıxışı dayandırıb.

İclasın sonunda Məmmədov ona təqdim edilən ittiham aktını cırıb. -03B-