Beynəlxalq Bankın keçmiş rəhbərinin məhkəməsində

Bazar ertəsi Ağır Cinayətlər Məhkəməsində Beynəlxalq Bankın keçmiş rəhbəri Cahangir Hacıyevin və onun bir qrup əməkdaşının işi üzrə proses davam edib.

Bu gün müttəhim Azad Cavadov ifadə verib. O, H.Hacıyevin nəzarətində olan fındıq emalı zavodunun direktoru olub.

Bank bu müəssisəyə 5 mln. manat verib. Lakin pullar geri qaytarılmayıb və müəssisə Beynəlxalq Bankın nəzarətinə keçib.

Sonra Cavadov 17 mln. manat kredit götürüb. Onun sözlərinə görə,  vergi borcunu ödəmək üçün pulları götürməyə məcbur olub.

Cavadov qaynanasının adına 816 min manat götürüb, ancaq məqsədini açıqlamayıb.

60 mln. manat həcmində növbəti kredit fındıq emalı zavodunun genişləndirilməsi üçün götürülüb. Cavadov bu kreditdən 6 mln. manatın oğurlanması barədə istintaqın ittihamını təkzib edib.

C.Hacıyev bildirib ki, Cavadov onun kurs yoldaşı olub və bu cür əməliyyatların keçirilməsini ona “etibar edib”.

Sonra “Inter Security” MMC-nin təhlükəsizlik xidmətinin əməkdaşları ifadə veriblər. Bu şirkətin adına 1 mln. manatadək kredit  sənədləşdirilib. Onların sözlərinə görə, əməkdaşların adına kreditlər Beynəlxalq Bankın rəhbərliyinin tapşırığı ilə götürülüb, ancaq onlar bu pulları görməyiblər.

Proses davam edir. Xatırladaq ki, Beynəlxalq Bankın keçmiş rəhbəri külli miqdarda mənimsəmə və dələduzluqda ittiham olunur. O 2015-ci ilin dekabrında həbs edilib.-02D-