Beynəlxalq Bankın keçmiş sədrinin işi üzrə məhkəməyə 6 şahid gəlməyib

Bakı/19.09.16/Turan: Bu gün Bakı Ağır Cinayətlər Məhkəməsində hakim Əfqan Hacıyevin sədrliyi ilə «Azərbaycan Beynəlxalq Bankı” ASC-nin İdarə Heyətinin keçmiş sədri Cahangir Hacıyev və onunla birlikdə saxlanılan digər 7 təqsirləndirilən şəxslərin işi üzrə proses davam edib.

Bugünki prosesdə ifadə verməyən 6 şahidin barəsində məcburi gətirilmə haqqında qərar çıxarılıb. Amma məlum olub ki, onlar ölkəni tərk etdiklərinə görə məhkəməyə gələ bilmirlər.

Hacıyevin vəkili Aqil Layıcov şahidlərin iştirakının vacib olduğunu deyib. Amma məhkəmə həmin şahidlərin ibtidai istintaqa verdikləri ifadələri elan etməklə kifayətlənib.

Belə ki, şahid Vüqar Sadıqov “İnter Security” şirkətinin əməkdaşı olduğunu, adına pul götürüldüyünü, sənədləri imzaladığını deyib deyib. Amma o, adına kredit alınması haqqında sənəd imzaladığını bilməyib.

Şahid Tərlan İsmayılov istintaqa bildirib ki, ABB-nin keçmiş rəhbər işçisi Məmməd Cahangirov onun şəxsiyyət vəsiqəsini götürüb və bankdan onun adına 300 min kredit rəsmiləşdirib. İsmayılov deyib ki, Cahangirov bankın rəhbər işçisi olduğuna görə etiraz etməyib.

Maliyyə Bazarlarına Nəzarət Palatasının baş müfəttişi Ayaz Vəliyev bildirib ki, fiziki şəxslərə və Hacıyevin yaxınlarına verilən kreditlər qanun pozuntuları ilə verilib.

Daha sonra fasilə elan edilib. Fasilədən sonra məlum olub ki, vəkillər Aqil Layıcov və Azər Tağıyev prosesdə iştirak etmir. Hakim onlardan Vəkillər Kollegiyasına şikayət edəcəyini bildirib və iclası sentyabrın 21-nə keçirib. -16D-