Biznesmenin və anasının qətlinin motivləri aydın deyil

Hüquq-mühafizə orqanları biznesmen Aleksandr Məhərrəmovun və anası Janna Məhərrəmovanın rezonans doğuran qətlinin üstünün açıldığını bildiriblər.

Bakı şəhər Polis İdarəsinin və Prokurorluğun birgə məlumatında deyilir ki, yanvarın 19-da gecə 1949-cu il təvəllüdlü Janna Məhərrəmovanın və oğlu, 1982-ci il təvəllüdlü Aleksandr Məhərrəmovun cəsədləri qətl əlamətləri ilə öz mənzillərində aşkar edilib.

Faktla bağlı 120.2.7-ci (iki və daha artıq şəxsin qəsdən öldürülməsi) maddə ilə cinayət işi açılıb.

Operativ tədbirlər nəticəsində şübhəli şəxs qismində əvvəllər 234.1-ci (qanunsuz narkotik dövriyyəsi) maddə ilə mühakimə olunmuş 1977-ci il təvəllüdlü Ruhin Allahverdiyev saxlanılıb.

İstintaq müəyyən edib ki, yanvarın 17-də Allahverdiyev Məhərrəmovla əvvəlcədən əldə etdiyi razılıq əsasında təmir işləri üçün onların evinə gəlib. Gətirdiyi çəkiclə o, qurbanlarının başına çoxsaylı zərbələr endirərək, onları qətlə yetirib.

Allahverdiyev J.Məhərrəmovanın çantasından 20 manat, oğlunun portfelindən isə 200 manat götürüb və qapını açarla bağlayaraq qaçıb gizlənib. İstintaq davam edir.

Press-relizdə cinayətin motivləri birbaşa açıqlanmır, amma soyğuna işarə edilib. Bir sıra KİV-lər bildiriblər ki, cinayətə ev sahibi və usta arasında işin dəyəri haqqında münaqişə səbəb olub.

Lakin bir müddət əvvəl mətbuat bildirib ki, məhkəmə-tibbi ekspertizanın məlumatına görə, Məhərrəmovlar yanvarın 18-nə keçən gecə ölüb.

Bu zaman A.Məhərrəmovun cəsədi giriş qapısının dəhlizində olub ki, bu, qatilin mənzilə girdikdə dərhal qurbanını qətlə yetirdiyi mənasına gələ bilər. Ananın cəsədi otaqda divanın yanında aşkar edilib. Qadın gecəlikdə idi, divanda isə yataq sərilmişdi, bu isə o demək ola bilər ki, qatil evə girdikdə o, yatırdı. Kriminalistlər evdə axtarış və oğurlanmış əşya izləri aşkar etməyib.

Rəsmi versiyaya inansaq, gecə vaxtı ustanın gəlməsi faktı özü çətin izah olunur.

Aleksandr Məhərrəmov “Biznes-Dialoq” konsaltinq firmasına rəhbərlik edirdi. -06D-