Bloger İlya Varlamov Bakıdadır

Bakı/05.11.18/Turan: Bloger İlya Varlamov bazar günü yenidən Azərbaycana gəlib. Belə ki, iki gün öncə hava limanında azərbaycanlı sərhədçilər onu Bakıya buraxmamışdılar. Bu barədə o, öz bloqunda yazıb.

"Məni Bakıdan deportasiya etdikdən sonra İstanbula uçdum. Bu, Azərbaycanı tezliklə tərk etmək və deportasiya edilənlər üçün zalda gecələməməkdən ötrü yeganə əlverişli reys idi. Axşama Qroznıya bilet alınmışdı. Ancaq planlar yenə də həyata keçmədi. https://varlamov.ru/3161341.html
Telefon zəngi. Naməlum Azərbaycan nömrəsi...Bir kişi özünü Sərhəd Xidmətinin əməkdaşı kimi təqdim edir. Dünənki insidentə görə üzrxahlıq edir. Deyir ki, yalnışlıq baş verib və mənə qarşı heç bir iradları yoxdur. Dünən əməkdaşlar düzgün qərar qəbul etməyiblər. Bütün xərclərinizi ödəməyə hazırıq, zəhmət olmasa, qayıdın, biletinizi alarıq. Sonradan br neçə nəfər mənə telefon edərək deportasiyaya görə üzrxahlıq etdilər, bilet aldılar. Mən isə Qroznıya bileti geri qaytardım. Dördüncü dəfədir ki, qısa səfərə görə bütün planlar dəyişir", - İ.Varlamov yazır.

Bakıda İ.Varlamovu hörmətlə qarşılayıblar. Dərc etdiyi fotoda sərhədçi xanım ona çiçək dəstəsi təqdim edir.

"Bakıda təyyarənin çıxışında məni gözləyirlər. Sərhədçi geyimində olan gənc qız mənə böyük buket təqdim edir. Həyatımda ilk dəfədir ki, kimsə mənə çiçək verir, xoşdur".

Bundan öncə İ.Varlamovu Bakıya buraxmayaraq bildirmişdilər ki, onun ölkədə olması arzuedilən deyil. O ehtimal edirdi ki, qadağa əvvəlki postları ilə əlaqədar ola bilər: "Pis Bakı", "Ölü Bakı", "Bakı: təhlükəli və narahat şəhər" və s. -06D-