Bloger Mehman Hüseynova qarşı təxribat

Dünən küçədə bloger Mehman Hüseynova hücum törədilib.

Blogerin öz facebook səhifəsində yazdığına görə, cümə gün saat 15.10 radələrində o, evdən çıxıb və öz məhəlləsindən çıxarkən artıq mülki geyimli bir şəxsin maşından enərək onun arxasınca gəldiyini görüb.

Bloger avtobusla gedərkən və bərbərxanaya girdikdə izlənildiyinin davam etdiyini görüb.

“Bərbərxanadan çıxarkən dostlarıma zəng etdim və mənə qarşı təxribat hazırlandığı barədə xəbərdarlıq etdim”, deyə Hüseynov yazır. Bərbərxanadan çıxarkən onu izləyən bir nəfərə daha üç nəfərin qoşulduğunu görüb.

“Mən əks istiqamətə getdim, amma bu şəxslərdən biri düz gözlərimə baxaraq üstümə gəldi, var gücü ilə mənim çiynimə vurdu və əlimdən yapışdı. Elə arxadakılar da biz tərəfə gəlməyə başldılar. Dərhal onun əlindən çıxıb naməlum istiqamətə qaçmağa başladım”, deyə Hüseynov yazır.

Bloger hesab edir ki, onu davaya cəlb etmək və sonradan xuliqanlıqda ittiham etmək, ya da üstünə narkotik atmaq istəyirdilər. O, bu insanların polis, yoxsa hansısa məmurun adamları olduğunu bilmir.

“Amma onu dəqiq bilirəm ki, mənə qarşı atılan hər bir addımın, hər bir təhlükənin arxasında bu hakimiyyət dayanır. Və bunun məsuliyyətini birbaşa ölkə rəhbərliyi daşıyır”, deyə yazan Hüseynov səbəbi jurnalist fəaliyyətində, hakimiyyəti və dövlət məmurlarını tənqid etməsində görür.

“İllərdir mən bu hökümətin, bu nazirlərin, bu deputatların, məmurların maskalarını çıxarıb, onları ifşa edib xalqa təqdim etmişəm. Son vaxtlar isə yuxardakıların xalqdan oğurlanan pulları hara xərclədiklərini araşdırıb, məmurların mülklərini, biznes şəbəkələrini araşdırıb camaata göstərirdim”, deyə Hüseynov yazır.

“Görünür bu reportajlar onları qorxuya salıb və məni aradan götürmək qərarına gəliblər. Amma xeyri yoxdur, mən dayanmayacağam, məmur özbaşnalıqlarına, qanunsuzluğa, saxtakarlığa göz yuman deyiləm.

Bilmirəm bu sifarişin arxasında kim durub, Kəmaləddin Heydərov, Ziya Məmmədov, Ramil Usubov və ya başqa kimsə. Mənə qarşı atılan hər belə addım bu hökümət tərəfindən atılır”, deyə bloger qeyd edir.

Son vaxtlar Hüseynov facebook-da öz SANCAQ production səhifəsində FHN rəhbəri Heydərovun, nəqliyyat naziri Məmmədovun, əmək naziri Səlim Müslümovun, Bakı meri Hacıbala Abutalıbovun, keçmiş deputat Qalib Salahzadənin, deputat Tahir Süleymanovun villaları haqqında reportajlar dərc edib. -06D-