BMT Qaçqınlar üzrə Agentliyi insan hüquqlarına dair elektron məlumat bazasını işə salıb

 Dekabrn 10-da BMT-nin Qaçqınlar üzrə Agentliyi insan hüquqları və qaçqınlarla bağlı 4500 sənəddən ibarət olan “Refworld” adlı yeni elektron məlumat bazasını rus dilində istifadəyə verməklə İnsan Hüquqları Gününü qeyd edir. 

İnternet səhifəsi (www.refworld.org.ru) hökumət məmurlarına və hakimlərə hər hansı bir şəxsin qaçqın olub-olmaması barədə qərar verməyə kömək edən elektron axtarış və himayə vasitəsi kimi  geniş istifadə olunan və ingilis dilində mövcud olan “Refworld” məlumat bazasının əsasında tərtib olunub. Sığınacaq prosedurlarına cəlb olunmuş digər tərəflər – hüquqşünaslar, hüquqi yardım təminatçıları, QHT-lər də həmçinin, bu yeni vasitədən faydalanacaqlar. Mənbə rus dilində səlis, tərəfsiz və daim yenilənməkdə olan məlumatların məhdudluğunun aradan qaldırılması, eyni zamanda Şərqi Avropa ölkələrində və rus dilinin istifadə olunduğu digər ölkələrdə sığınacaq məsələləri ilə məşğul olan məmurların əhatəli və heç bir təsirə məruz qalmayan məlumatlara çıxışına əmin olmaq məqsədilə hazırlanıb. 

“Bizə məlum olduğu kimi, regionda miqrasiya xidmətləri və sığınacaq məsələləri ilə məşğul olan hüquqşünasların bu məsələlər üzrə yaxşı qərarlar çıxarması üçün mənbə ölkəsi barədə məlumatlara daha yaxşı çıxışa ehtiyacları olduğunu nəzərə alaraq, BMT QAK uzun zamandır ki, “Refworld” məlumat bazasının rus dilində olan versiyasını hazırlamaq istəyirdi”, - BMT QAK-ın Azərbaycandakı nümayəndəsi Daq Siqurdson bildirib.  

“Refworld” məlumat bazası hesabatların, direktiv sənədlərin, metodiki tövsiyələrin, eləcə də Avropa İnsan Hüquqları Məhkəməsinin qərarlarının, Avropa İttifaqının sığınacaq verilməsi ilə bağlı hüquqi sənədlərinin və müvafiq milli qanunvericilyin geniş kolleksiyasını ödənişsiz əsaslarda istifadəçilərə təklif edir. Kolleksiya BMT QAK və digər BMT orqanları, hökumətlər, beynəlxalq, regional və qeyri-hökumət təşkilatları, akademik təsisatlar və ədliyyə orqanları daxil olmaqla 60-dan çox mötəbər mənbədən müntəzəm olaraq yenilənir. 

“Refworld” məlumat bazasında uşaqlar, gender bərabərliyi və qadınlar, Avropa İnsan Hüquqları Məhkəməsinin qərarları, qaçqınların himayəsi və beynəlxalq miqrasiya, qaçqın statusunun müəyyənləşdirilməsi və BMT insan hüquqları sistemi kimi mövzuları əhatə edən səhifələr daha geniş auditoriya üçün - hüquq müdafiəçiləri, hakimlər, elmi işçilər və tədqiqatçılar üçün eyni dərəcədə maraqlı olacaq. 

“Refworld” məlumat bazasının ingilis versiyası BMT QAK tərəfindən iki onillik əvvəl ilkin olaraq kompakt və DVD disklərdə saxlanan himayə ilə bağlı məlumatlar kolleksiyası kimi yaradılıb. Bu məlumat bazası 2007-ci ildə İnternetdə yerləşdirilib və bununla BMT QAK-ın beynəlxalq himayə mandatını gücləndirib və himayə məlumatlarını hamı üçün əldə oluna bilən edib. 

“Refworld” məlumat bazasının rus dilində olan versiyasının yaradılması Şərqi Avropada və Cənubi Qafqazda sığınacaq sistemləri keyfiyyətinin yaxşılaşdırlması təşəbbüsü layihəsi çərçivəsində həyata keçirilib. 2,5 milyon ABŞ dolları dəyərində büdcəsi olan, Avropa İttifaqı tərəfindən birgə maliyyələşdirilən və BMT QAK tərəfindən həyata keçirilən iki illlik bu layihə altı ölkədə dövlət orqanları ilə sığınacaq prosedurlarının keyfiyyəti və qaçqınların himayəsi ilə bağlı iş aparılmasına yönəlib. Layihə Azərbaycanla yanaşı Belarus, Gürcüstan, Ermənistan, Moldova və Ukaynanı əhatə edir.—06D—