Bu ilin əvvəlindən dəm qazından zəhərlənmə ilə bağlı 500-ə yaxın müraciət daxil olub

  2015-ci ildə Səhiyyə Nazirliyinin Respublika Toksikologiya Mərkəzinə dəm qazından zəhərlənmə ilə bağlı 454 müraciət daxil olub, onlardan 332-i xəstəxanaya qəbul edilib.  Bu barədə mərkəzin rəhbəri, Səhiyyə Nazirliyinin baş toksikoloqu Azər Maqsudov mətbuat konfransında bildirib.

Onun sözlərinə görə, xəstəxanaya yerləşdirilənlərin 10 faizinin vəziyyəti ağır, 70 faizinin vəziyyəti isə orta-ağır qiymətləndirilib. Yerdə qalanlara ilkin tibbi yardım göstərilib

A.Maqsudov qeyd edib ki, hər həftə dəm qazı zəhərlənməsi ilə əlaqədar rayonlardan 10-12 müraciət olur. Müşahidələr göstərir ki, dəm qazından zəhərlənənlərin əksəriyyəti orta yaşlı insanlardır.

Dəm qazından zəhərlənmələr əsasən qapalı mühitdə və vanna otağında baş verir. Bundan əlavə, qapalı şəraitdə olan maşında kondisioner işləyərsə dəm qazı orada olan şəxsi zəhərləyə bilər.

“Buna görə də maşını və kondisioneri işə saldıqda ehtiyatlı hərəkət etmək lazımdır”, - A.Maqsudov deyib.

O əlavə edib ki, xəstəyə ilkin tibbi yardımın göstərilməsi və vaxtında müraciət fəlakətin qarşısını ala bilər.—36B--