Cəbrayıl qaçqınları Biləsuvarda etiraz aksiyası keçiriblər

Dekabrın 22-də axşam Biləsuvar rayonunda Cəbrayıl qaçqınları etiraz aksiyası keçirib. 

İştirakçılardan biri Turan-a bildirib ki, onlar qaçqınlar qəsəbəsinə elektrik enerjisinin verilməsinin dayandırılmasından narazılıq ediblər.

Əraziyə gətirilən polis dəstələri ilə etirazçılar arasında qarşıdurma yaranıb.

Cəbrayıl Rayon İcra Hakimiyyəti başçısının müavini Arif Fərzəliyev etiraz aksiyasının keçirildiyini təsdiqləyib. Lakin hazırda qaçqınların məskunlaşdırğı qəsəbədə vəziyyət “stabil”dir.

Onun sözlərinə görə, elektrik enerjisinin verilməsi bərpa edilib. Qaçqınların elektrik enerjisinə görə borcu yoxdur, ancaq yerli sakinlər ayrılan limiti keçib və elektrik paylaşdırıcı şəbəkə işığın verilməsini dayandırıb. Eyni zamanda qaçqınlar üçün 11 qəsəbəyə elektrik enerjisinin verilməsi dayandırılıb. Hakimiyyətlə danışıqlardan sonra məsələ yoluna qoyulub.

Öz növbəsində DİN və Baş Prokurorluq birgə bəyanat yayaraq bildiriblər ki, bir qrup Cəbrayıl qaçqını İcra Hakimiyyətinin binasına yürüş edərək istifadə olunan elektrik enerjisinə görə haqqın ödənilməməsini tələb ediblər.

Aksiya iştirakçlıları 9 polis əməkdaşına daş və ağac parçaları ilə müxtəlif dərəcəli bədən xəsarətləri yetirib, 1 xidməti avtomobilin şüşələrini sındırıblar.

 Görülən tədbirlər nəticəsində fəal iştirakçılardan olan Cəlal Quliyev, İlkin İsgəndərov və Gülağa Alməmmədov saxlanılıb.

 Faktla bağlı Baş Prokurorluqda Cinayət Məcəlləsinin 186.2.2-ci (əmlakı qəsdən məhv etmə və ya zədələmə), 233-cü (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) və  315.2-ci (xidməti vəzifələrini yerinə yetirməsi ilə əlaqədar hakimiyyət nümayəndəsinə qarşı həyat və sağlamlıq üçün təhlükəli olan zor tətbiq etmə) maddələri ilə cinayət işi başlanılıb.-16D-