Milli Məclisin deputatı Çingiz Qənizadə xalq artisti Ilhamə Quliyevanın son günlərdəki davranışlarına hüquqi qiymət verilməsi üçün Baş prokuror Zakir Qaralova müraciət edib. Bu barədə deputat Modern.az-a açıqlamasında bildirib.
“Mən belə hesab edirəm ki, keçmiş köməkçisi Mehriban Hüseynovanın Ilhamə Quliyeva haqqında Bakı Istintaq Təcridxanasından mətbuata ünvanladığı müraciətdə kifayət qədər ciddi faktlar var. Bir hüquqşünas kimi demək istəyirəm ki, Mehriban Hüseynovanı Ilhamə Quliyevanın vaxtilə diz çökdürüb, onun şəxsiyyətini, ləyaqətini alçaltması, təhqir etməsi qatı cinayət faktıdır. Bu videogörüntü birbaşa cinayət məsuliyyəti yaradır. Hadisə özlüyündə Azərbaycan Respublikasının qanunvericiliyi ilə cinayət məsuliyyəti anlayışına əsaslanır. Təbii ki, belə olan halda hər bir şəxs cinayət məsuliyyəti daşımalıdır.
Çox təəssüf ki, bu videogörüntülərdən sonra siz mətbuat da, bizlər də yerlərimizdə susduq. Nəticədə bir şəhid bacısı kifayət qədər əsaslar olmadan həbs edilib və bu gün günahsız yerə əzab çəkir. Bu gün bir ailəli xanım, ana, şəhid bacısı heç bir günahı olmadan həbsdədi. Axı nəyə görə?..
Ilhamə Quliyevanın keçmişi və bu günü qaranlıq olan oğlunun Vüqar adlı dostunun bir ifadəsi ilə Mehriban Hüseynova tutulub. Bu yolverilməzdir. Bu gün biz elə bir ölkədə yaşayırıq ki, hər bir məsələyə kifayət qədər ciddi və hüquqi qiymət verilməlidir. Heç kimin xüsusi bir statusu yoxdur ki, başqaları üzərində ağalıq, fironluq eləsin. Cənab prezident sonuncu müşavirədə də söylədi ki, heç kim toxunulmaz deyil, heç kimin toxunulmazlıq statusu yoxdur. Bu sözlər elə həm də Ilhamə Quliyevaya aiddir.
Bu o həddə çatıb ki, cəmiyyətin müxtəlif təbəqələri artıq etiraz səslərini ucaldırlar. Ilhamə Quliyeva bu gün nə üçün himayə olunur? Bu insana “gözün üstündə qaşın var!”, “sakit ol yerində, otur!”, “artıq bəsdir!” deyəcək kimsə yoxdur. Onun arxasında duran, onu himayə edən gözəgörünməz böyük qüvvələr də Ilhamə Quliyevaya heç nə demir.
Bu adam gah prezidentin, gah şəhərin polis rəisinin, gah da müxtəlif yüksək vəzifəli şəxslərin adından danışır. Deyir ki, “mən onlarla dostluq edirəm. Kimsə mənə nəsə desə, götürüb zəng edərəm, başına oyun açdıraram.
Bu məsələ ilə bağlı baş prokuror Zakir Qaralova müraciət edəcəm. Mehriban Hüseynovanın da müraciətini öz müraciətimə əlavə edəcəm. Baş prokurordan xahiş edəcəm ki, bu məsələni şəxsi nəzarətinə götürsün.
Bir nəfərin ifadəsi ilə bir qadının tələm-tələsik həbs edilməsi yolverilməzdir.
Inanıram ki, Zakir müəllim bu işi şəxsi nəzarətinə götürməklə həm Mehriban Hüseynovanın məktubda qeyd etdiyi məsələyə hüquqi qiymət verilməsinə göstəriş verəcək, həm də onun haqqındakı həbs qətimkan tədbirinin dəyişdirilməsinə baxacaq.
Ilhamə Quliyevanın dişində şirə qalıb. O, Nazpəri Dostəliyevanın heç bir qanun pozuntusu olmadan ifadə etdiyi fikirlərə görə hansısa vasitələrlə məhkəmədə cərimələdib 25 min manat pul aldı. Onun çıxışlarından görünür ki, Ilhamə Quliyeva bu yolun yolçusudur. Onun insanları haqsız yerə, heç bir əsas olmadan məhkəməyə verib onlardan pul qopartmaq istəyi var.
Hələ indiyə qədər Azərbaycan məhkəmə praktikasında Nazpəri Dostəliyevaya qarşı qəbul edilən hökm kimi ədalətsiz hökm olmamışdı. Çünki hələ kiminsə o qədər külli miqdarda cərimələnməsi olmamışdı.
Ilhamə Quliyeva son illərdə mətbuatdakı çıxışlarına, insanlara qarşı təhqir, təhdid, şantaj dolu hərəkətlərinə görə mütləq cavab verməlidir.
Hüquqşünas Aslan Ismayılovun da Ilhamə Quliyeva haqqında səsləndirdiyi fikirlərinə tam şərikəm. Məndən öncə millət vəkilləri Jalə Əliyeva, Nizami Cəfərov da bu barədə fikirlər bildiriblər.
Xalq artisti adını daşıyan insanlar cəmiyyət qarşısında açıq-saçıq, tərbiyəsiz, təhqiramiz ifadələrlə davamlı şəkildə nümayiş olunurlarsa, bu, artıq cəmiyyətə, dövlətə, xalqa qarşı olan ən böyük hörmətsizlikdir.
Onlara verilən titullar, adlar məsələsinə mütləq baxılmalıdır. Buna görə mədəniyyət və turizm naziri Əbülfəz Qarayevin “biz bu işlərə qarışmırıq” fikri ilə qəti şəkildə razı deyiləm. Onlar bu işlərə qarışmalıdırlar. Çünki onlar “xalq artisti” adını hansısa təqdimatlar əsasında həmin layiq olmayan insanlara veriblər. Buna görə də bu təqdimatları verən vəzifəli şəxslər həmin insanların hərəkətlərinə də qiymət verməlidirlər”.
Rəy yaz