Deputat: Mən də Mehmana görə, xahiş eidirəm ki...

"Vallah, Mehman Əliyevin həbsinə görə mən özüm də narahat oldum. Çünki Mehman Əliyevi şəxsən tanıyıram, ona böyük hörmətim var, kifayət qədər tanınmış jurnalistdir, "Turan" agentliyini yaradan şəxslərdən biridir. Nəinki Azərbaycanda, ölkəmizdən kənarda da onun məqalələri dərc olunur". Deputat Vahid Əhmədov bunu "Turan" agentlyinin direktoru Mehman Əliyevin həbsinə münasibətinə dair "Yeni Müsavat" qəzetinə müsahibəsində bildirib.

İttihamların vergi məsələsi ilə əlaqədar olduğunu deyən V.Əhmədov bunun araşdırılacağını , həm də bəzi jurnalistlərin M.Əliyevi zaminə götürmək istədiklərini nəzərə çatdırır: " İnanıram ki, cənab prezident bununla əlaqədar öz müsbət qərarını verəcək. Hesab edirəm ki, hansısa anlaşılmazlıq olub, çünki,

M.Əliyev Azərbaycanın müstəqillik tarixində izi olan bir insandır. Jurnalistika sahəsində də kifayət qədər təcrübəlidir. Ona görə, hesab edirəm ki, M.Əliyevlə bağlı məsələ özünün müsbət həllini tapacaq".

V.Əhmədov deyir ki, demokratiya, söz azadlığı sahəsində müəyyən mübahisə, nöqsanlar ola bilər və bunların yerinə qoyulması üçün müəyyən vaxt lazımdır.

V.Əhmədov hesab edir ki, bu çağırışlara reaksiya müsbət olacaq: "Mən özüm də cənab prezidentdən xahiş edirəm ki, M.Əliyevlə bağlı həbs-qətimkan tədbiri aradan qaldırılsın və o, zaminə buraxılsın. Ola bilər ki, vergi ilə əlaqədar hansısa mübahisəli məsələləri var. Doğrudan da bu məsələ sübuta yetiriləcəksə, hər kəs öz cəzasını çəkməlidir, bunu hamımız başa düşürük".

Amma yenə deyirəm, indiki zamanda biz hamılıqla elə etməliyik ki, bizim bütün diqqətimiz Qarabağ məsələsinin həllinə yönəlsin, diqqətimizi yayındıran digər məsələlər olmasın.