![DİN bloger Mehman Hüseynovun hərəkətindən prokurorluğa şikayət edib](https://turan.az/resized/media/2017/main/011200180221-750-500-resize.webp)
DİN bloger Mehman Hüseynovun hərəkətindən prokurorluğa şikayət edib
Azərbaycan DİN hesab edir ki, Reportyorların Azadlıq və Təhlükəsizlik İnstitutunun (RATİ) rəhbəri, bloger Mehman Hüseynov polisin imicinə zərbə vuran bəyanatla çıxış edib. DİN blogerin oğurlanması və ona işgəncə verilməsi faktını inkar edir. DİN blogerin hərəkətlərinə hüquqi qiymət verilməsi üçün Baş Prokurorluğa müraciət edib. Bloger özü isə DİN-in bəyanatını gülünc adlandırıb.
DİN-in yanvarın 12-də yaydığı məlumata görə, yanvarın 9-da axşam Bakının Nəsimi rayonunda Mərdanov qardaşları və Həzi Aslanov küçəsinin kəsişməsində M.Hüseynov və Əkrəm Təhməzov adlı vətəndaş arasında münaqişə yaranıb. Onların ikisi də saxlanılıb. Yanvarın 10-da səhər həmin şəxslərin barəsində İnzibati Xətalar Məcəlləsinin 535.1 (polis əməkdaşının qanuni tələblərinə tabe olmamaq) maddəsilə protokol tərtib edilib və materiallar məhkəməyə göndərilib Məhkəmənin qərarı ilə Ə.Təhməzov 10 sutka həbs edilib, M.Hüseynov isə 200 manat cərimə olunub.
DİN qeyd edir ki, M.Hüseynov mətbuat nümayəndələrinə müraciətində “ictimaiyyəti çaşdırmaq və polisin imicinə ziyan vurmaq” üçün əsassız fikirlər səsləndirib və bildirib ki, giya polis tərəfindən oğurlanıb, qanunsuz azadlıqdan məhrum edilib, işgəncələrə məruz qalıb.
DİN polisə ağır cinayət törətmək ittihamı ilə ləkə vuran M.Hüseynovun hərəkətlərinə hüquqi qiymət verilməsi üçün Baş Prokurorluqda vəsatət qaldırıb. Təhqiqatın nəticələri ilə bağlı əlavə məlumat veriləcək, DİN bildirib.
Bloger DİN-i bəyanatını gülünc adlandırıb.
“DİN bəyan edir ki, mən düzgün danışmıram, məni oğurlamayıblar, işgəncə verməyiblər. Yəqin, mənim çəkib göstərdiklərim də doğru deyil. Mənim çəkdiyim villalar, saraylar Azərbaycan nazirlərinə məxsus deyil, Almaniya nazirlərinin mülkiyyətidir. Polis və məmur özbaşınalığı ilə bağlı çəkdiyim faktlar isə Azərbaycanda yox, Avropada baş verir. Belə məlum olur ki, bizdə polis idarələrində heç kimə işgəncə vermirlər, konfet, şokolad paylayırlar”, - bloger kinayə ilə deyib.
O deyib ki, özünü günahkar saymasa da ona verilən cəriməni ödəyəcək və bütün məbləği 1,3 və 5 qəpiklərlə ödəyəcək.
Vəkil Aqil Layicov DİN-in hərəkətini səriştəsizlik adlandırıb.
“DİN xüsusi ittihamçı kimi məhkəməyə müraciət edə bilər. Cinayət təqibinin xüsusi ittiham qaydasında irəli sürülməsinin prokurorluğa aidiyyatı yoxdur”, - o bildirib.
Qeyd edək ki, bundan öncə bloger Elçin Sadıqov blogerin fotosunu yayıb. Onun bədənində zorakılıq izləri olub. 06D--
Cəmiyyət
-
Bazar günü, iyulun 28-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir.
-
Bakı şəhəri ərazisində qanunsuz miqrasiyaya qarşı mübarizə çərçivəsində müxtəlif ünvanlarda əməliyyat tədbirləri həyata keçirilib. Daxili İşlər Nazirliyindən verilən məlumata görə, Baş Dövlət Yol Polisi İdarəsinin qanunsuz miqrasiyaya qarşı mübarizə idarəsinin əməkdaşları tərəfindən Azərbaycan ərazisində yaşamaq və qalmaq hüququ verən sənədləri olmayan 34 əcnəbi müəyyən edilərək saxlanılıb.
-
Azərbaycan Müdafiə Nazirliyi (AMN) iyulun 25-də bəyanat yayaraq son günlərdə Ermənistanı Kəlbəcərdə ağır silahlar, Tovuz istiqamətində isə kvadrokopter tətbiq etməklə ona qarşı “təxribatlar törətməkdə” günahlandırıb. Üstəlik, Ermənistanın Qərb ölkələri ilə hərbi əməkdaşlığından narazılıq və narahatlıq ifadə edib.
-
Daxili İşlər Nazirliyinin Baş Narkotiklərlə Mübarizə İdarəsinin son əməliyyatları zamanı narkotik maddələrin qanunsuz dövriyyəsilə məşğul olan mütəşəkkil dəstənin 5 üzvü - əvvəllər məhkum olunmuş Bəhlul İsmayılov, Röyal Əliyev, Xəyal Alıyev, Samir Ağayev və Əli Məmmədli saxlanılıblar.
Rəy yaz