DİN İkram Rəhimova polisdə işgəncə verilməsi barədə məlumatı təkzib edib

Daxili İşlər Nazirliyinin (DİN)  nümayəndəsi Reallıq.info portalının redaktoru İkram Rəhimovun Sumqayıt Şəhər Polis İdarəsində işgəncələrə məruz qalması haqda məlumatı təkzib edib.

DİN mətbuat xidmətinin əməkdaşı Orxan Mansurzadə bu xəbəri əsassız və şantaj adlandırıb.

Onun sözlərinə görə, İ.Rəhimov böhtan yazdığına görə bir iş adamı tərəfindən xüsusi ittiham qaydasında mühakimə olunub və bir il müddətinə azadlıqdan məhrum edilib.

“Odur ki, bu adamın Polis İdarəsində işgəncələrə məruz qalması haqda dedikləri əsassızdır. Bu xəbəri yayanlar, sadəcə, ictimai rəyi çaşdırmaq istəyirlər”, - O.Mansurzadə Turan agentliyinə bildirib.

Xatırladaq ki, Sumqayıt Şəhər Məhkəməsinin qərarı ilə İkram Rəhimov bu il noyabrın 25-də CM-nin 147.2-ci (ağır və xüsusilə ağır cinayətin törədilməsi haqqında böhtan)  maddəsilə bir il müddətinə azadlıqdan məhrum edilib.

Jurnalistin mühakimə olunmasına “Hürriyyət” qəzetində “Ucuz market” ətrafındakı hadisələrlə bağlı yazması səbəb olub. Jurnalist iddia edib ki, bu market şəhər icra başçısı tərəfindən bağlanıb, rüşvət verdikdən sonra isə market fəaliyyətə başlayıb. Xüsusi ittihamçı qaydasında “Ucuz market”in rəhbəru Vüqar Qələndərov çıxış edib. 05B06--