Din xadiminə zorakılıq edən vəhabi həbsə alınıb

Bu günlərdə Saatlı rayonunda din xadiminə zorakılıq göstərmiş şəxs iyunun 16-sı axşam saatlarında həbsə alınıb. Bu haqda Turan-a zorakılığa məruz qalan din xadimi Tahir Hacıyev özü bildirib.

Onun sözlərinə görə, zorakılıq edən Hikmət adlı şəxsi axşam saatlarında qohumları özləri polisə təhvil verib. Fakt üzrə cinayət işi açılıb, dəlil sübutlar toplanır.

T.Hacıyevin sözlərinə görə, Hikmət adlı şəxs zorakılıq göstərməsini din xadiminin vəhabilik barədə tənqidi fikirlər söyləməsi, Azərbaycandan Suriyaya gedərək mənasız döyüşlərə qatılanların qarşısını almaq təbliğatı arapması ilə izah edib. Gənclərin radikal dini cərəyanlardan uzaqlaşdırılmasının zərurətə döndüyünü deyən T.Haciyev bu mənada din xadimlərinin də məsuliyyəti olduğunu nəzərə çatdrıb. Radikal cərəyanlara qarşı təbliğatı Allaha, xalqa və millətə xatir bundan sonra da aparacağını bəyan edib.

Xatırladaq ki, Saatlı rayon mərkəzinə yaxın 1500 nəfərlik əhalisi olan Mustafabəyli kəndində hüzr məclisi aparan T.Hacıyev iyunun 16-da məclisi bitirib hüzr sabiblərinə başsağılğı verərkən Hikmət adlı kənd sakininin zorakılığına məruz qalıb. Bundan sonra kənd əhalisi ayağa qalxaraq, hüquq-mühafizə orqanlarından din xadiminə qarşı zorakılıq törədən şəxsin həbsini tələb ediblər. Hikmətin yaxınları kənd əhalisi ilə qarşıdurma yaranacağından ehtiyat edərək onu polisə özləri təhvil veriblər. -05B-