Riçard Morninqstar: Demokratiya və insan haqları sahəsində işləri davam etdirəcəyik

“Mən deyə bilmərəm cəmiyyətin Helsinki Komissiyasında Azərbaycanla bağlı dinləmələrdən gözləntiləri necə olub. Amma, dinləmələr çox yaxşı və tarazlı olub”. Bu barədə ABŞ səfiri Riçard Morninqstar ABŞ Konqresinin Helsinki Komissiyasında dinləmələrlə bağlı Turan-ın sualına cavabda bildirib. 

Səfirin fikrincə, dinləmələr zamanı demokratiya və insan haqları ilə bağlı bir çox məsələlər əksini tapıb. “Hər iki ölkənin bu məsələlər üzrə birlikdə necə işləməsi barədə də məqamlar qeyd olunub. Ancaq ölkələrimiz arasındakı əlaqələr yalnız bu mövzu ilə məhdudlaşmır. İki ölkənin ortaq maraqlara malik olduğu bir sıra digər sahələr də vardır ki, biz bu sahələr üzrə birgə işimizi davam etdirəcəyik. Azərbaycan ABŞ-ın güclü dostu, tərəfdaşı olaraq qalır və biz ölkələrimiz arasındakı birgə maraqları əhatə edən bir sıra məsələlər, o cümlədən demokratiya və insan haqları məsələləri üzrə birgə işimizi davam etdirməliyik”, deyə Morninqstar qeyd edib.

O, ölkədə demokratiya, insan haqları, siyasi məhbus məsələsi ilə bağlı problemlərin həlli barədə Turan-ın sualının cavabında deyib ki, səfirliyi dövründə demokratiya və insan haqları fəal şəkildə iştirak etdiyi, diqqətdə saxladığı bir sahə olub. “Mənim buradakı fəaliyyət müddətimin son gününə qədər biz hökumətlə bu fəaliyyətimizi davam etdirəcəyik. Mənim fəaliyyət müddətim başa çatdıqdan sonra da bu işlər davam etdirləcək”, deyə səfir bildirib. -03B-