Dini fəal yoxa çıxıb, ailəsi həbsindən şübhələnir

Bakı/01.09.23/Turan: Müsəlman Birliyi Hərəkatının (MBH) İdarə Heyətinin üzvü Ağaəli Yahyayevin ailəsi onun yoxa çıxdığını bildirir. 

Yahyayevin həyat yoldaşı Şəhanə Yahyayeva Turan-a bildirilib ki, avqustun 31-i  axşamdan ondan xəbər tuta bilmirlər: "Yoldaşım dünən saat 19:30-da evdən ev paltarı ilə maşınla anasını bağdan götürməyə çıxıb və dedi ki, başqa heç bir yerə getməyəcək. Bağa qədər maksimum 1 saatlıq yol var. 1 saat keçəndən sonra telefonla onu yığdım. Telefonu, interneti açıq olsa da, cavab verməyib. Anasına zəng vurdum, bağa gəlmədiyini dedi".

Fəalın yoldaşı qeyd edib ki, onun polisə etdiyi zənglər də nəticə verməyib.

Yahyayevanın fikrincə, yoldaşı saxlanılıb: "O gün biz Bakı Ağır Cinayətlər Məhkəməsinə inanclı şəxslərin prosesinə gedəndə bizi maşınla izləyirdilər. Ağaəli bəy siyasi məhbus həyatı yaşayıb, uzun müddət həbsdə qalıb deyə ailə ilə çoxlu vaxt keçirməyə çalışır. Dünən ilk dəfə idi ki, bizsiz evdən çıxdı və dərhal onu apardılar. Deməli, onu əvvəlcədən izləyirdilər".

O qeyd edib ki, vəkil Yahyayevi axtarıb hər yerə müraciət etsə də, onu tapa bilməyib.

Məsələ ilə bağlı Daxili İşlər Nazirliyindən münasibət öyrənmək mümkün olmayıb. 0