Dini icma rəhbərinin evinə basqın edənlərin məqsədi nə olub?

“Quba rayonunda yəhudilərin yaşadığı Qırmızıkənddə Dağ Yəhudiləri dini icmasının rəhbəri Boris Sumanduyevin evinə basqınla bağlı təhqiqat davam edir, məndə olan informasiyaya görə, hələ ki, saxlanılan yoxdur”, - Dini Qurumlarla İş üzrə Dövlət  Komitəsinin sədri Mübariz Qurbanlı Turan-a bildirib.

M.Ourbanlı Quba rayon hüquq-mühafizə orqnalarındakı mənbələrə, habelə bu rayondan yəhudi əsilli deputat Yevda Abramova istinadən hadisənin sıradan kriminal hadisə olduğunu söyləyib. Komitə sədri evə basqın edən şəxslərin qızıl, zinət əşyaları aparmasına diqqət çəkərək bu faktın özünü cinayətin kirminal xarakterinin göstəricisi adlandırıb.

Basqın üçün dini icma rəhbərinin evinin seçilməsinin təsadüf olub-olmamasına gəlincə, M.Qurbanlı bunu hüquq-mühafizə oqranlarının təhqiqatlarının müəyyən edəcəyini vurğulayıb. “Basqın edənlər maskalı olub, öz aralarında Qırmızıkənd yəhudilərinin danışdığı ləhcədə danışırmışlar”, - komitə sədri bildirib.

Quba rayon polis şöbəsindən Turan-a cinayət hadisəsinin motivi barədə açıqlama verilməyib, amma faktla bağlı araşdırmanın davam etdiyi deyilib.

“Təəssüf ki, dini icma rəhbərinə qarşı belə bir hadisə törənib, bunu qəti şəkildə pisləyirəm və ümid edirəm ki, ölkənin hüquq-mühafizə orqanları bu cinayətin üstünü açaraq, onun səbəblərini üzə çıxaracaqlar”, - Qafqaz Müsəlmanları İdarəsinin (QMİ) sədri, şeyxülislam Allahşükür Paşazadə baş verən hadisəyə münasibətini ifadə edib.  

Xatırladaq ki, şənbə günü B.Simanduyevin evinə bir qrup maskalı şəxs hücum edib. Evdə olan B.Simanduyev və bacısı fiziki zorakılığa məruz qalıblar. Basqınçılar B.Sumanduyevin bacısına bıçaq xəsarəti yetiriblər. O, Qubada xəstəxanaya yerləşdirilib.-05B-