Dini icmalara maliyyə yardımları verilməsinə başlanılıb

Dini Qurumlarla İş üzrə Komitə maliyyə yardımı ayrılmış ilk 10 dini icma sədrinin iştirakı ilə toplantı keçirib.

Komitə yaydığı xəbərdə bildirir ki, dövlət başçısı İlham Əliyev 2014-cü ilin noyabrında dini maarifləndirmə və milli-mənəvi dəyərlərin təbliği işini daha da gücləndirmək üçün 2,5 milyon manat vəsait ayırıb.

Komitə sədri Mübariz Qurbanlı ayrılan maliyyə vəsaitlərinin ölkədə dini maarifləndirmə və milli-mənəvi dəyərlərin təbliği işinə sərf ediləcəyini vurğulayıb. O qeyd edib ki, maliyyə vəsaitinin dini icmalara verilməsi üçün Qiymətləndirmə Komissiyası yaradılıb. Komissiya icmaların təqdim etdikləri layihələrin müzakirəsindən sonra layihələrə uyğun icmalara vəsait ayrılması qərarı qəbul edir.  

M.Qurbanlı əlavə edib ki, icma sədrləri ayrılan vəsaitin istifadəsi üçün rəhbərlik etdikləri icma üzvlərinin rəyini də nəzərə almalıdırlar.

Komitə sədri milli-mənəvi, o cümlədən dini dəyərlərin insanlara düzgün çatdırılmasının vacibliyini vurğulayıb. O, icmaların reallaşdırdıqları  layihələrin, dini maarifləndirmə və milli-mənəvi dəyərlərin düzgün təbliğinin radikalizmlə mübarizədə də öz müsbət təsirini göstərəcəyinə ümidvar olduğunu vurğulayıb.

M.Qurbanlı dini icma sədrlərinin yerlərdə axund və imamlarla, eləcə də Qafqaz Müsəlmanları İdarəsinin (QMİ) nümayəndələri ilə qarşılıqlı əməkdaşlıq şəraitində fəaliyyət göstərmələrinin vacibliyini diqqətə çatdırıb.

Toplantıda çıxış edən icma sədrləri ayrılan maliyyə vəsaitinin dini maarifləndirmə işinə sərf olunacağını qeyd ediblər. -05D-