Dini komitə xarici saytları dövlətə etimadsızlıq yaratmaqda ittiham etdi

Dini Qurumlarla İş üzrə Dövlət Komitəsi bəyanat yayıb.

Sənəddə son günlər xaricdən idarə olunan bəzi dini saytlarda Azərbaycanda dini durum, qanunvericiliyə edilmiş dəyişikliklərə dair həqiqətə uyğun olmayan fikirlərin yer adlığı deyilir. 

Bu saytlar qanunvericiliyə dəyişiklikləri dini etiqad azadlığının məhdudlaşdırılması, dini mərasimlərin qarşısının alınması, hətta Aşura mərasiminin qadağan edilməsi kimi dəyərləndirirlər. Bundan əlavə, bu dəyişikliklər həm də dindarlara təzyiq göstərilməsi kimi qiymətləndirilir. Müəlliflər bu xəbərlərin həqiqətə uyğun olmadığını bəyan edir. Sənəddə bəzi hallarda belə xəbərlərin komitənin nümayəndələri adından yayıldığı nəzərə çatdırılır. 

Bəyanata görə, dindarlar arasında belə şaiyələrin yayılması dindarlarda dövlətə qarşı mənfi rəy formalaşdırmağa yönəlmiş uğursuz cəhddir. Müəlliflər iddia edirlər ki, son günlərdə parlamenitn qəbul etdiyi qanunlar, qanunvericiliyə dəyişikliklər dini etiqad azadlığının məhdudlaşdırılmasına yönəlməyib.

Bununla yanaşı, ölkədə Aşura mərasiminin keçirilməsinin qadağan olunması barədə deyilən fikirlər də əsassız sayılır. -05D-