Dini konfessiyalar islamdaxili təfriqələrdən narahatlıq bildiriblər

Çərşənbə axşamı “Gülüstan” sarayında MDB Müsəlmanları Məşvərət Şurası öz işinə başlayıb və elə həmin gün də işini başa vurub.

Günün birinci yarısı konfransın ünvanına daxil olan təbriklər oxunub. Azərbaycan, Rusiya, Belarus prezidentləri, Rusiya subyektlərinin rəhbərləri konfransa təbriklər ünvanlayıblar. Tədbirə MDB ölkələrilə yanaşı Pribaltika, Avropa, ərəb ölkələrinin dini konfessiyaları qatılıblar. Bütünlükdə isə konfransda 18 ölkə təmsilçisi iştirak edib.  

Günün ikinci yarısında konfransda islam dininin sülh dini olması haqda çıxışlar olub. Son zamanlar dünyada baş verən bütün neqativlərin islam dininin ayağına yazılmasına etiraz ediblər. “Ola bilər ki, müsəlmanlar ideal deyil, amma islam ideal dindir”, - deyə Osetiya-Alaniya müftisi Hacımurad Qatsalov islam dininə olan hücumları pisləyib. Qalan natiqlər də bu mövqeyi ifadə ediblər. 

İslam dini daxilindəki təfriqələrə də toxunulub. Bu mənada vəhhabilik, “hizbi-təhrir”, “cəmaəti-islam” dini birliklərinin islam daxilinə parçalanma saldığı, müsəlmanları günahsız qətlə yetirməkdə ittiham ediblər. Ekstremizm və terroru qəti şəkildə pisləyiblər. Belə “psevdo-dinçi”lərin din haqda məlumatları olmayan gəncləri radikallığa yönləndirmələri pislənilib. Buna qarşı bütün müsəlman dünyasının dirəniş göstərməsi təklifi səsləndirilib.  

Din daxilində təfriqəçilikdən qurtarmaq üçün bütün islam dünyasında vahid dini təhsilin tətbiq olunması təklifi irəli sürülüb. Eyni zamanda hansı dini ədəbiyyatın yararlı və yararsız sayılması üçün yenə də islam dünyasında vahid standartların hazırlanması vurğulanıb. 

Konfransda Fransada eynicinslərin ailə qurması, seksual azlıqların haqlarının tanınması haqda qanun qəbul olunmasına ciddi etiraz edilib. Bu qanunlar dini inkarçılıq kimi dəyərləndirilib, bu qanunlara etiraz ifadə edilib.

Konfransda müzakirələrin sonu olaraq Yekun sənəd qəbul edilib. Bu sənədi qəbul edən dini konfessiyalar dini təfriqəçiliyə, gənclərin radikal dini cərəyanlara cəlb edilməsinə, dinin siyasiləşdirilməsinə qarşı mübarizədə əməkdaşlığı vacib saydıqlarını bəyan ediblər. Konfransda səslənən təkliflərin reallaşdırılması üçün MDB Müsəlmanları Məşvərət Şurası nəzdində İşçi qrupu və Məşvərət Şurasının Fondunun yaradılması məqsədəuyğun hesab edilib. -05C-