DTRA direktoru və Azərbaycan səfiri müdafiə sahəsində əməkdaşlıq məsələlərini müzakirə ediblər

Hərbi təhlükələrin azaldılması üzrə Agentliyinin direktoru və Azərbaycanın ABŞ-dakı səfiri Vaşinqtonda mövcud təhlükələri və bir sıra birgə səyləri müzakirə ediblər, bu barədə Turan-a Pentaqonun mətbuat xidmətindən bildiriblər.

Hərbi təhlükələrin azaldılması üzrə Agentlik (DTRA) ABŞ-ın və onun tərəfdaşlarının kimyəvi, bioloji, radioloji, nüvə və digər kütləvi qırğın silahlarından müdafiəsi ilə məşğul olur.

“Azərbaycanla bu layihələr üzrə münasibətlərimiz çox yaxşıdır və uzun tarixə malikdir”, deyə DTRA direktoru Kennet Mayers bildirib.

Azərbaycanda bir neçə çox mürəkkəb və nadir təhlükəsizlik hədələri var və bizim gördüyümüz tədbirlər tərəfdaşımıza kömək edə və onun üçün əlavə imkanlar yarada bilər”, deyə o əlavə edib.

Azərbaycanla əməkdaşlığa həmçinin müdafiə qurumlarında islahatlara, NATO ilə qarşılıqlı fəaliyyətə dəstək və beynəlxalq missiyalara töhfələr daxildir. ABŞ Azərbaycanın müdafiə və təhlükəsizlik qurumlarını dəstəkləyir, bu dəstəyə təlim və məsləhətlər, peşəkar hərbi təhsil və fövqəladə hallarda idarəetmə daxildir.

ABŞ NATO və Azərbaycanın birgə bölmələrinin, o cümlədən Kosovo və İraqda, indi isə həm də Əfqanıstanda beynəlxalq əməliyyatlarda iştirak edən sülhməramlı batalyonun inkişafına kömək edir.

Azərbaycan həmçinin Əfqanıstana tranzit üçün hava, yerüstü və su yollarını verir.

“Biz bizim dəniz və quru sərhədlərimiz boyunca kütləvi qırğın silahlarının yayılmaması məsələsi üzrə regional tərəfdaşlar və ABŞ-la sıx əməkdaşlıq etmişik”, deyə Azərbaycanın ABŞ-dakı səfiri Elin Süleymanov öz növbəsində bildirib. O, Azərbaycanın hava limanlarında və sərhəd keçid məntəqələrində müvafiq avadanlığın quraşdırıldığını, Azərbaycanın sahil müdafiə xidmətinin maliyyələşdirildiyini, energetika və infrastrukturun müdafiəsi sahəsində əməkdaşlığı qeyd edib. -25D-