Ədalət Partiyası tək oğlan uşaqlarının əsgər aparılmamasını təklif edir

Ədalət Partiyası əsgər Ceyhun Qubadovun vəfatı ilə bağlı bəyanat verib. 

Bəyanatda əsgər C.Qubadovun vəfatı ilə bağlı xəbərin partiyanı hiddətləndirdiyi deyilir. Bu faktın müharibə şəraitində olan ölkənin Silahlı Qüvvələrinin imicinə xələl gətirdiyi qeyd edilir. Belə faktlara görə valideynlərin və əsgər yaşlı çağırışçıların orduya vətənə xidmət yeri kimi yox, cəzaçəkmə, ölüm düşərgəsi kimi baxdığı vurğulanır. Bu səbəb üzündən hərbi xidmətdən yayınmaq istəyənlərin sayının artdığı deyilir. 

Ekspertiza rəyində əsgərin ürək çatışmazlığından dünyasını dəyişdiyi deyilsə də? anasının mətbuata açıqlamalarının, İnternetdə yayılan video və foto görüntülərin deyilənə şübhə yaratdığı nəzərə çatdırılır. Hüquq-mühafizə orqanları C.Qubadovun zorakı üsullarla qətlə yetirildiyi iddialarının araşdırılmasını tələb edilir. Bu hadisə ilə bağlı istintaqın obyektiv aparılması, günahkarların cəzalandırılması, hərbi strukturların fəaliyyətindəki nöqsanların aradan qaldırılması təklif olunur. 

Baş verən hadisə bəyanatda təkcə hərbi hissələrdə tüğyan edən özbaşınalıq, intizamsızlıq və dərəbəyliyin yox, həm də orduya çağırış sistemindəki neqativ halların göstəricisi sayılır. Müəlliflər həqiqi hərbi xidmətə çağırışla bağlı qanunvericiliyə dəyişiklik edilərək ailənin tək oğlan övladının, xüsusən, atası vəfat edən oğlan uşaqlarının həqiqi hərbi xidmətdən azad olunmasını təklif edirlər. -05D-