Əhali üçün su bahalaşıb

Azərbaycan Tarif (qiymət) Şurasının qərarı ilə mayın 16-dan su təchizatı və tullantı suların axıdılması (kanalizasiya) üçün yeni tariflər müəyyən olunur.

Yeni tariflərə əsasən, Bakı, Sumqayıt, Xıralan şəhərlərinin və Abşeron rayonun əhalisi üçün bir kubmetr suyun qiyməti ƏDV daxil olmaqla 0,35 manat təşkil edəcək (əvvəlki qiymət 0,30 qəpik). Digər inzibati ərazi vahidlərinin əhalisi üçün tarif 0,05 manat yüksəlir və bir kubmetr su 0,30 manat təşkil edəcək.

Bu zaman digər istehlakçı qrupları (qeyri-əhali) üçün tariflər dəyişməyib və əvvəlki kimi bir kubmetr su 1 manat təşkil edəcək.

Eyni zamanda, sudan xammal kimi istifadə edən istehlakçılar üçün tariflər bir kubmetr su üçün 12 manatdan 8 manata qədər (tullantı suların axıdılması nəzərə alınmaqla) endirilib.

Yeni tariflə bir kubmetr tullantı suların axıdılması (kanalizasiya suyu) əhali üçün hazırki 0,06 manat yerinə 0,15 manat, digər istehlakçılar üçün 0,30 manat yerinə 1 manat təşkil edəcək.

Beləliklə, bundan sonra əhali bir kubmetr sudan istifadə və həmin həcmdə kanalizasiya axıntısı üçün əvvəlki 0,36 manat yerinə 0,50 manat ödəyəcək. Başqa sözlə, sözügedən xidmətlər əhali üçün üçdə bir dəfədən çox bahalaşıb.

Həmçinin, Tarif Şurasının 26 iyul 2007-ci il tarixli qərarı ləğv edilib. Həmin qərara əsasən, Ceyranbatan su anbarından suyun topdansatış tarifi müəyyən edilmişdi. Bu qiymət 1000 kubmetr su üçün 20 manat təşkil edirdi. -06D-