Ekologiya və Təbii Sərvətlər Nazirliyi tənqidlərdən sonra Göygöl ərazisinə girişi bağlayıb

Göygöl vətəndaşlara açıldıqdan bir neçə gün  sonra Ekologiya və Təbii Sərvətlər Nazirliyi yenidən gölə girişi bağlayıb. Buna səbəb Göygöl Milli Parkının vətəndaşlar tərəfindən çirkləndirilməsidir.

Belə ki, nazirlik departamentinin nümayəndəsi Vaqif Cavadov KİV-ə bildirib ki, Milli Parkın ərazisini çirkləndirənlər 800 manatadək cərimə olunacaq və “qara siyahı”ya daxil ediləcəklər. Təmizliyə riayət etməyənlərin aşkar edilməsi üçün video-müşahidə kamerası quraşdırılacaq.

Qeyd edək ki, uzun illər Göygöl bağlı olub. Bir neçə gün öncə göl ərazisinə girişə icazə verilib. Bundan sonra KİV-də və sosial şəbəkələrdə gölün ətrafında çirklənmiş ərazilərin fotoları yayılıb. Ekologiya və Təbii Sərvətlər Nazirliyi qayda-qanun yarada bilməməkdə, zibil qutuları qoymamaqda və zibillərin ərazidən vaxtında daşınmamasında itiham edilib.

Nazirlik Şahdağla bağlı da analoji hərəkət etmişdi. Belə ki, alpinistlər qalaq-qalaq zibillərin fotosunu dərc etmişdilər. Nazirlik bu məlum faktın təkzib edilməsini tələb etmişdi. Buna nail olmadıqda “sözəbaxmayan” alpinistlərə müxtəlif bəhanələrlə Şahdağ ərazisində zirvəyə qalxmaq qadağan edilmişdi.-02D-