Əkrəm Əylislidən DNK analizi götürülüb

Aprelin 8-də yazıçı Əkrəm Əylisli istintaqda ifadə verib.

Vəkil Elçin Sadıqov Facebook səhifəsində yazıb ki, Ə.Əylisli ilə birlikdə Hava Nəqliyyatında Polis İdarəsinin istintaq şöbəsində olub.

 “Bu gün Hava Nəqliyyatında Polis İdarəsinin istintaq şöbəsinin rəisi Vüqar Sərdarovun çağırışına əsasən Əkrəm Əylisli ilə istintaqda olduq. Əkrəm Əylislinin əl barmaq izlərini götürdülər, şəklini çəkdilər və ağız boşluğunun hər iki tərəf dərinliyindən DNK analizi üçün nümunə götürdülər. İstintaq hərəkətləri 2 saata yaxın çəkdi”, - vəkil qeyd edib.

Əkrəm Əylislinin barəsində istintaq orqanı başqa yerə getməməklə bağlı qətimkan tədbiri seçib. İstintaq dövründə yazıçı Bakı şəhərindən kənara çıxa bilməz. Yazıçıya Cinayət Məcəlləsinin 221.1-ci (xuliqanlıq) maddəsi ilə ittiham elan edilib. İttihama görə, Əkrəm Əylisli bu il martın 30-da Bakı hava limanında ictimai qaydanı pozub, söyüş söyüb, Dövlət Sərhəd Xidmətinin əməkdaşı Nihal Seyidovun sinəsinə zərbə vurub.

Əkrəm Əylisli aprelin 6-da istintaqa verdiyi ifadəsində ittihamları qəbul etməyib. Yazıçı beynəlxalq konfransda çıxış  etmək üçün gedərkən saxlanılıb. -03B-