Prezident İlham Əliyev: «İşğal olunmuş ərazilər azad edilməyincə sülh olmayacaq»

Prezident İlham Əliyevin RF baş naziri ilə görüşündə ikitərəfli əməkdaşlığa dair mühüm məsələlər müzakirə edilib, Qarabağ münaqişəsinin nizamlanması mövzusuna ətraflı toxunulub. Bu barədə dövlət başçısı danışıqlardan sonra bildirib.

“Bilirik ki, aprelin 7-də Dmitri Anatolyeviçin Ermənistana rəsmi səfəri planlaşdırılmışdı. Münaqişə zonasında yaranmış vəziyyəti nəzərə alaraq aprelin 8-də Azərbaycana gəlişini çox yüksək qiymətləndiririk. Bu bir daha göstərir ki, Rusiya üçün həm Ermənistan, həm də Azərbaycanla münasibətlər böyük əhəmiyyət kəsb edir”, - İ.Əliyev vurğulayıb.

“Ermənistanla Azərbaycan arasında münaqişənin nizamlanmasına gəlincə, təəssüf ki, bu, uzun illərdir öz həllini tapmır. Uzun illərdir ki, Azərbaycan torpaqları işğal altındadır. Təkcə Dağlıq Qarabağ deyil, ona bitişik yeddi rayon da 20 ildən çoxdur ki, işğal altındadır. Azərbaycanlı əhali oradan qovulub, bütün evlər, tarixi abidələr dağıdılıb. Təkcə münaqişə zonasından 700 mindən çox məcburi köçkünümüz var. Ermənistandan olan 250 mindən çox qaçqını da əlavə etsək 1994-cü ildə atəşkəs əldə edildiyi vaxtdan adambaşına düşən məcburi köçkün və qaçqına görə ən yüksək faiz göstəricisinə malik olmuşuq”, - dövlət başçısı bildirib.

Münaqişənin nizamlanması mexanizmi mövcuddur, BMT Təhlükəsizlik Şurasının dörd qətnaməsi var. Bunlar erməni işğalçı qüvvələrinin Azərbaycan ərazilərindən çıxarılmasını tələb edir. Təəssüf ki, bunlar yerinə yetirilmir. Rusiya ATƏT-in Minsk Qrupunun həmsədri kimi, münaqişənin nizamlanması işində mühüm rol oynayır.

“Azərbaycan danışıqlar prosesinə sadiqdir. Ermənistanın Azərbaycanı eskalasiyada günahlandırması əsassızdır. Aprelin əvvəlində baş vermiş silahlı toqquşmaların xarakteri  onu göstərir ki, bizim irimiqyaslı hərbi əməliyyatlara başlamaq niyyətimiz olmayıb və yoxdur. Biz, sadəcə, torpaqlarımızı və mülki şəxslərimizi qoruyuruq”, - dövlət başçısı vurğulayıb.

“Status-kvonun dəyişdirilməsi, Azərbaycan ərazilərinin işğalından imtina münaqişənin tammiqyaslı nizamlanması üçün əsas şərtdir. Bu, baş verən kimi regionda sülh, əmin-amanlıq, əməkdaşlıq  bərqərar olacaq və bundan bütün region ölkələri qazanacaq”, - İ.Əliyev qeyd edib.-02D-