Eks-prezidentlərə ayrilan pullarin taleyi necə olacaq

Iyunun 21 –də prezident İlham Əliyev “Azərbaycan Respublikasının keçmiş prezidentinin və onun ailə üzvlərinin təminatı haqqında” Konstitusiya qanunu və qanunun tətbiqi barədə fərman imzalayıb. Qanun Konstitusiyanın 108-ci maddəsinin II hissəsinə uyğun olaraq əvvəllər Azərbaycan prezidenti seçilmiş şəxsin (keçmiş prezident) və onun ailə üzvlərinin təminatı qaydalarını müəyyən edir. Sənədə görə, keçmiş prezident fəaliyyətdə olan prezidentin aylıq vəzifə maaşının 50 faizi məbləğində aylıq pensiya alır. Eyni zamanda, keçmiş prezidentin vəfatından sonra ona ödənilən pensiyanın 50 faizi ailəsinə verilir.

Dövlət qulluqçusu üçün müəyyən edilmiş tibbi təminatlara dair bütün qanun və qaydaların müddəaları keçmiş prezidentə və onun ailə üzvlərinə şamil olunur. Keçmiş prezidentə həmçinin üç nəfərdən artıq olmayan təhlükəsizlik heyəti, bir sürücü, bir nəqliyyat vasitəsi verilir. Fəaliyyətdə olan prezidentin aylıq vəzifə maaşının 20 faizi məbləğində aylıq təmsilçilik xərcləri ödənilir. Keçmiş prezidentə və onun arvadına (ərinə) ömürlük diplomatik pasport verilir. Qanuna görə, keçmiş prezident (onun arvadı və ya əri ) seçilməzdən əvvəl və prezidentlik səlahiyyətlərini icra edərkən etdiyi hərəkətlərə (hərəkətsizliyə) görə inzibati və ya cinayət məsuliyyətinə cəlb edilə bilməz. Beləliklə, Azərbaycan prezidenti İlham Əliyevin əmək haqqının 15 min manat olduğunu nəzərə alsaq eks prezident Ayaz Mütəllibova dövlət büdcəsindən ayda 7500 manat ayrılacaq.

Eks prezidentlər Əbülfəz Elçibəylə Heydər Əliyevin ailələri isə bu vəsaitin 50 faizini, yəni 3750 manat ala biləcəklər. Əbülfəz Elçibəyin ailəsinə ayrılan pul onun xanımına çatacaq. Maraqlıdır, bəs Heydər Əliyevin ailəsi üçün ayrılacaq 3750 manatı indiki prezident İlham Əliyev və onun bacısı Sevil Əliyeva qəbul edəcək, yoxsa bu vəsait xeyriyyə məqsədilə istifadə ediləcək?