Ekspertiza həbs olunan gənclərin narkotik maddədən istifadə etmədiyini bildirib

Mayın 10-da Heydər Əliyevin abidəsinin üzərinə yazı yazan gənc fəallar Qiyas İbrahimov və Bayram Məmmədovun hüquqları pozulub. Onlar həbs edildikdən sonra qanunsuz narkotik maddə dövriyyəsində ittiham olunublar və təcridxanada yerləşdiriblər. Həmin vaxtdan İbrahimov yalnız iki dəfə qohumları ilə görüşüb, Məmmədova isə görüş verilmir. Bu barədə onların vəkili Elçin Sadıqov bildirib. Halbuki, qanuna görə, həbs edilənlərə həftədə bir dəfə görüşmək hüququ var.

İyulun 5-də və 12-də hər iki gənc narkoloji ekspertizadan keçib. Ekspertiza müəyyən edib ki, onlar narkotik maddədən istifadə etmir.

Eyni zamanda istintaq sellofan paketlərin daktiloskopik ekspertizasının keçirilməsi və müttəhimlərin barmaq izlərinin nəticələri ilə tutuşdurulması barədə müdafiə tərəfinin vəsatətini təmin etməyib. Belə ki, istintaqın bildirdiyinə görə, həmin paketlər gənclərə məxsusdur. Odur ki, müdafiə tərəfi məhkəmə istintaq zamanı bu məsələni yenidən qaldıracaq.

Mayın 12-də gənclər polisdə saxlanma zamanı işğəncələrə məruz qalmalarından şikayətləniblər, məhkəmə isə onlarn şikayətinin araşdırılması barədə qərar qəbul edib, istintaq araşdırma aparmayıb.

  Müdafiə tərəfi hesab edir ki, buna sübut kimi mayın 10-12-də gənclərin saxlandığı polis idarəsinin müşahidə kamerasına baxmaq kifayətdir. Müdafiə tərəfi bu məsələni də məhkəmədə qaldıracaq.–06C06--