Elçibəy İnstitutu Azərbaycanın ən yeni tarixinin saxtalaşdırılmasına etiraz edir

Bakı/30.01.21/Turan: Azərbaycan ordusunun 44 günlük Vətən müharibəsində qazandığı hərbi qələbənin siyasi-diplomatik, beynəlxalq hüquq baxımından başa çatdırılması üçün xalqımızın, cəmiyyətimizin ən sıx şəkildə səfərbər olmasının, milli həmrəyliyin tələb olunduğu bir məqamda hakim rejim xalq hərəkatının lideri Əbülfəz Elçibəyə, hərəkatın ümummilli təşkilatı olan Azərbaycan Xalq Cəbhəsinə və Musavata ləkə yaxmaq məqsədilə ən yeni tariximizin saxtalaşdırılması ilə məşğul olur.  Bu barədə Elçibəy İnstitutunun bəyanatında deyilir.

Bəyanat müəllifləri Elçibəyin və adı çəkilən qurumların 1992-ci ildə Şuşa şəhərinin düşmənə verilməsində iştirakını təkzib edirlər.

Bəyanatda xatırladılır ki, Şuşa şəhərinin işğalı ilə bağlı cinayət işi üzrə Xalq Cəbhəsinin mərkəzi və regional təşkilatlarından heç kim şahid qismində belə cəlb edilməyib.

Bundan başqa, o vaxtki müdafiə nazirinin işi üzrə məhkəmə qərarında onun Şuşa şəhərinin təhvil verilməsində təqsiri təsdiq edilməyib.

Eyni zamanda, həmin dövrdə Şuşanın müdafiəsinə rəhbərlik edən hərbçilərə qarşı da Şuşanın düşmənə təhvil verilməsində hər hansı cinyət əməli istinad olunmayıb, onlar hazırkı iqtidar dövründə yüksək hərbi rütbələr alıb vəzifələr tutmaqda davam edirlər.

Siyasi rəqiblərin ünvanına ittihamların məqsədi cəmiyyətin diqqətini 3220 km2 ərazimizin hələ də dövlət suverenliyimizdən kənarda, de fakto işğalı altında qalması, Xankəndində terrorçu bayrağının dalğalanması faktlarından və sülhməramlı adı ilə Azərbaycanda yerləşdirilmiş Rusiya hərbi kontinigentinin müstəqilliyimiz üçün yaratdığı təhlükələrdən və ermənilərlə rusların nəzarəti altındakı torpaqlarımızla bağlı  gizli planlardan yayındırmaqdır.  

Hökumət bu sahədə elmi cəhətdən araşdırılması tələb olunan problemlərin olduğunu düşünürsə, o zaman Elçibəy İnstitutu obyektiv alim və tarixçilərdən ibarət müstəqil elmi komissiya yaradılmasını təklif edir və həmin komissiya ilə əməkdaşlıq etməyə hazır olduğunu bildirir.

Elçibəy İnstitutu ən yeni tariximizin siyasi məqsədlərlə təhrif və saxtalaşdırılmasının keçən əsrin 80- ci illərin sonu 90- cı illərin əvvəllərinndə AXC üzvü olan, milli-azadlıq hərəkatının iştirakçısı olan yüz minlərlə insanın maraq və mənafelərinə toxunduğuna diqqəti cəlb edir.

Elçibəy İnstitutu bir daha iqtidar mənsublarını milli varlıq, milli güc, milli dövlətçilik üçün fəsadlar törədəcək qarşıdurma yolundan, saxta tarix yaratma cəhdlərindən çəkinməyə dəvət edir və xüsusi qeyd edir ki, Elçibəyin nəzəri, ideoloji, siyasi irsinin təhrif olunması və saxtalaşdırılmasına prinsipial şəkildə qarşı çıxmaqda davam edəcək.

Eyni zamanda Elçibəy İnstitutu əsasnaməsi ilə müəyyən olunmuş məqsəd və prinsiplər  istiqamətində fəaliyyət göstərərək, siyasi mənsubiyyətindən asılı olmayaraq bütün tərəflərlə əməkdaşlığa davam edəcəyini bəyan edir. -06D-