Ələsgər Məmmədli: «İnternet haqqında yeni qanuna ehtiyac yoxdur»

“Sosial şəbəkələri, İnternet resursları tənzimləyən qanun layihəsi təşəbbüsünü ən azı yanlış dəyərləndirirəm”, - hüquqşünas Ələsgər Məmmədli Turan-ın müxbirilə  söhbətində Mətbuat Şurasının sədri, deputat  Əflatun Amaşovun sosial şəbəkələrin və İnternet resursların fəaliyyətini tənzimləyən yeni qanunun qəbulunun vacibliyi barədə təşəbbüsünü belə dəyərləndirib.

Ə.Məmmədli sosial şəbəkələri nizama salmaq üçün yeni hansısa qanuna ehtiyacın olmadığı qənaətindədir: “Əgər sosial şəbəkələrdə birgəyaşayış qaydalarına zidd, ayrı-seçkiliyə çağırışlar olarsa bununla bağlı Cinayət Məcəlləsində kifayət qədər maddə var. Bundan əlavə, bu yaxınlarda məhz sosial şəbəkələrdə şəxsiyyət əleyhinə yönələn addımlarla bağlı Cinayət Məcəlləsinə yeni maddə əlavə edildi. Odur ki, sosial şəbəkələr və İnternet resursları KİV haqqında qanunla və digər müvafiq qanunlarla tənzimlənməlidir”. 

Bununla yanaşı Ə.Məmmədli daha bir maraqlı məqama toxunub və virtual aləmin hüdudlarının Azərbaycanla yekunlaşmadığını  bildirib: “Bu zaman qanunvericilik nə edə biləcək, Azərbaycan qanunvericiliyi başqa dövlətin ərazisində necə işləyəcək? Odur ki, fikrimcə, normal düşüncə sahibləri belə mövzuları, ümumiyyətlə, gündəliyə gətriməməlidirlər”, - hüquqşünas vurğulayıb. 05B-