Elina Hacıyevanın valideynləri istintaqdan narazıdır

Bakı/16.07.19/Turan: Aprelin 4-də 162 nömrəli tam orta məktəbində intihar edən, məktəbin 8-ci sinif şagirdi Elina Hacıyevanın anası Sevil Hüseynova və vəkilləri Emin İsayev, Sevinc Əliyeva və Azər Nağıyev mətbuat konfransı keçiriblər.

Konfranda bildirilib ki, tədbirdən öncə Sevil Hüseynovaya prokurorluqdan zəng vurub xəbərdarlıq ediblər ki, istintaq hələ ki bitməyib və o, istintaq sirrini açıqlaya bilməz.

Vəkil Azər Nağıyev bildirib ki, zərərçəkmiş tərəf məktəbin keçmiş direktoru Sevinc Abbasovanın barəsində seçilmiş ev dustaqlığı qətimkan tədbirinin uzadılmasından narazıdı və bununla bağlı apellyasiya şikayətini vermək niyyətindədilər. Vəkillər qeyd etdi ki, törədilmiş cinayət ağır kateqoriyaya aiddir və direktorun ev dustaqlığından razı deyillər, həbs qətimkan tədbirin seçilməsini istəyirlər. "Bu ev dustaqlığın müddəti Abbasovaya sonra məhkəmə tərəfindən güman ki veriləcək həbs cəzasından çıxılacaq. Həmçinin o ev dustaqlığında istintaqa təsir edə bilir. Biz istəyirik ki, hər bir vəzifəli şəxs işini aparanda bilsin ki, hər hansısa səhv hərəkətinə görə cəzalana bilər".

Elina Hacıyevanın atası Aydın Hacıyev bildirdi ki, istintaq 3 ay davam etməsinə baxmayaraq, heç bir irəliləyiş yoxdur. "Biz bilmək istəyirik günahkar kimdir. Niyə həkimlər cəlb olunmayıb? Çünki Elina xəstəxanaya düşəndə həkimlər ona baxmırdı və hətta əynində olan paltarını belə dəyişməyiblər. Uşaqa həkimin əli dəyməyib".

Elina Hacıyevanın anası Sevil Hüseynova isə qeyd etdi ki, Sevinc Abbasova hadisə baş verəndən sonra birinci növbədə təcili tibbi yardıma müraciət etməli idi, lakin iki saat ərzində bunu ettməyib. "Buna baxmayaraq o ev dustaqlığındadır. Halbuki hamıya məlumdur ki, Elinanın bizimlə olmamasının günahı direktordadır".

Vəkillər bildirib ki, istintaqın gedişi onları və valideynləri narahat edir. İşi ilə bağlı komissiya iştirakı ilə müstəqil ekspertizanın keçirilməsi barədə istintaqa verilmiş vəsatət rədd edildi, işində adı hallanan Səbail İcra Hakimin müavini Xalidə Bayrmovaya vəkillərin tərəfindən sualların verilməsi vəsatətə isə ümumiyyətlə cavab verilməyib. "İşin gedişatı ona yönəlib ki, yalnız məktəb direktorunun təqsiri üzərinə gedir. Amma digər şəxslərin o cümlədən dəhəkimlərin səhvi nəticəsində bu məsələdə istədiyimiz araşdırma aparılmır".

Vəkillər əlavə etdi ki, Elina Hacıyevanın qəbrinin təhqir edilməsi ilə bağlı Bakı Şəhər Baş Polis İdarəsində istintaq hərəkətləri aparılmır. "Aidiyyatı şəxslərlə əlaqə saxlaya bilmirilk və iş hansı mərhələdədir bizə heç bir məlumat verilmir".

Konfransı keçirənlər bildirdilər ki, yeganə tələbləri ədalətli qərar verilməsidir.

Baş Prokurorluq Elinanın ölümü ilə bağlı məlumat yayıb. Məlumatda xatırladılıb ki, Bakı şəhəri Səbail rayonu 162 nömrəli tam orta məktəbin 8-ci sinif şagirdi, 2004-cü il təvəllüdlü Elina Hacıyevanın təhsil aldığı məktəbin üçüncü mərtəbəsindən özünü ataraq intihar etməsi faktı ilə bağlı Cinayət Məcəlləsinin 125-ci (özünü öldürmə həddinə çatdırma) maddəsi ilə Bakı şəhər prokurorluğunda başlanmış cinayət işi üzrə məktəbin direktoru Sevinc Abbasova Cinayət Məcəlləsinin 143 (təhlükədə qoyma) və 314.2-ci (səhlənkarlıq, ehtiyatsızlıqdan zərərçəkmiş şəxsin ölümünə səbəb olduqda) maddələri ilə təqsirləndirilən şəxs qismində cəlb olunmuş və məhkəmənin qərarı ilə barəsində ev dustaqlığı qətimkan tədbiri seçilib.-0-