Elmir Abbasov 30 sutka inzibati qaydada həbs olunub /YENİLƏNİB/

Oktyabrın 13-də səhər saatlarında YAP-ın keçmiş qərargahının qarşısında siyasi fəalların həbsinə və Respublika Günü bayramın adının dəyişdirilməsinə etiraz edənlərdən fəallardan biri Elmir Abbasov 30 sutka inzibati qaydada həbs olunub.

Səbail Rayon Məhkəməsinin hakimi İlkin Rüstəmlinin sədrliyi ilə keçirilən məhkəmə prosesində Elmir Abbasov İnzibati Xətalar Məcəlləsinin 535-ci maddəsinin pozmasında təqsirli bilinib.

O, məhkəmə prosesində bildirib ki, polis bölməsində fiziki təzyiqə məruz qalıb.

*   *   *

2021 Oktyab 13 (Çərşənbə) 12:37:39

Gənc fəallar hakim partiyanın ofisi qarşısında etiraz aksiyası keçiriblər

Bakı/13.10.21/Turan: Oktyabrın 13-də NİDA və D18 Hərəkatının bir sıra gənc fəalları Yeni Azərbaycan Partiyasının keçmiş qərargahının yerləşdiyi binanın qarşısında aksiya keçiriblər.

Gənc fəallar Azərbaycanda AXCP üzvləri Niyaməddin Əhmədovun və Fuad Əhmədlinin, o cümlədən jurnalist, ictimai fəal Anar Abdullanın, eləcə də  digər siyasi məhbusların həbsinə etiraz ediblər.

Aksiya iştirakçıları “Rədd olsun irtica!”, “Yaşasın Cümhuriyyət!” şüarları səsləndiriblər.

Hadisə yerinə gələn polis gənc fəalları saxlayaraq, polis bölmələrinə aparıb. B barədə saxlanılanlardan biri – Rüstəm İsmayılbəyli öz facebook səhifəsində yazıb.

DİN isə heç kimin saxlanılmadığını, sadəcə olaraq aksiya iştirakçılarının ərazidən uzaqlaşdırıldığını bildirir. -16D-