Elşad Abdullayevin qardaşının itkin düşməsinin araşdırılması üçün yeni istintaq-əməliyyat qrupu yaradılıb

 Fəaliyyəti dayandırılmış Beynəlxalq Universitetin rektoru Elşad Abdullayevin 2003-cü ildə itkin düşmüş qardaşı Mahir Abdullayevin işi  üzrə yeni tərkibdə istintaq-əməliyyat qrupu yaradılıb. Bu barədə Baş Prokurorluğun mətbuat xidməti məlumatı yayıb.   

Məlumatda deyilir ki, Azərbaycan Beynəlxalq Universitetinin sabiq rektoru Elşad Abdullayevin prezident İlham Əliyevə müraciətini nəzərə alaraq qardaşı Mahir Abdullayevin 13 oktyabr 2003-cü il tarixində itkin düşməsi və digər faktlarla bağlı istintaq olunan cinayət işi üzrə baş prokurorun qərarı ilə Baş Prokurorluğun nəzdində tam yeni tərkibdə istintaq-əməliyyat qrupu yaradılıb. Qrupa rəhbərlik baş prokurorun böyük köməkçisi Elmar Camalova həvalə edilib.

Eyni zamanda “Cinayət prosesində iştirak edən şəxslərin dövlət müdafiəsi haqqında” 11 dekabr 1998-ci il tarixli qanuna müvafiq olaraq E.Abdullayevin Azərbaycana gəldiyi təqdirdə qeyd olunan cinayət işi üzrə zərərçəkmiş şəxs kimi şəxsi təhlükəsizliyi təmin ediləcək. 

Xatırladaq ki, Elşad Abdullayev sentyabrın 25-də sosial şəbəkələrdə keçmiş deputat Gülər Əhmədova vasitəsi ilə deputat olması üçün yüksək vəzifəli dövlət məmuruna rüşvət çatdırılması ilə bağlı danışıqları əks olunmuş video yayıldıqdan sonra bu məsələ gündəmdən düşmür. 

Bundan sonra rüşvət faktı ilə bağlı cinayət işi qaldırılıb, Elşad Abdullayevin  rektoru olduğu Beynəlxalq Universitetedə, qaynatasının ofisində axtarış aparılıb, Gülər Əhmədova deputata mandatından imtina edib. Prezident Administrasiyasının rəhbəri Ramiz Mehdiyev videoda 

adının hallandırılmasına münasibət bildirib.   Elşad Abdullayev həmçinin 2003-cü ildə itkin düşmüş qardaşı Mahir Abdullayevlə bağlı aparılan istintaqa inanmadığı barədə oktyabrın 3-də prezident İlham Əliyevə müraciət edib. Müraciətin mətnini həm də sosial şəbəkələrdə yayıb. 

O həmçinin bildirib ki, onun qardaşı hüquq-mühafizə orqanlarının əməkdaşlarından ibarət mütəşəkkil cinayətkar qrup tərəfindən pul məqsədilə oğurlanıb. Lakin bir neçə dəfə böyük pullar verən E.Abdullayev qardaşının azad edilməsinə nail ola bilməyib və onun taleyinə aydınlıq gətirə bilməyib. -03D-