Ermənistanda bir ailə Azərbaycanın xeyrinə casusluqda ittiham olunur

Azərbaycanın xeyrinə casusluq haqda informasiyanın gizlədilməsində ittiham olunan 18 yaşlı Diana Qoroyan öz günahını etiraf etmir. Bu barədə NEWS.am  saytı vəkil Liana Qasparyana isnadla bildirib.

“Müdafiə etdiyim şəxsdə belə məlumat olmayıb və bu işdə onun günahını sübut edən dəlil yoxdur”, - vəkil qeyd edib.

Təqsirləndirildiyi zaman Diananın 17 yaşı olub. İş üzrə ilk məhkəmə iclası yanvarın 25-də olacaq. Prosesin qapalı olacağı istisna edilmir.

İş üzrə bir neçə nəfər keçir. Rəsmi ittihamnaməyə görə, Rafik Papoyan Türkiyədə özünü Azərbaycan xüsusi xidmətinin nümayəndəsi kimi təqdim edən Seyran adlı şəxs tərəfindən ələ alınıb. Sonra casusluq fəaliyyətinə onun oğlu Sergey Papoyan da cəlb edilib. Ona tapşırılıb ki, Mataqisdəki (DQR) hərbi hissələrdən birində kontrakt ilə işə düzəlsin. Məlumat İnternetlə ötürülməliymiş.

Karina Qumaşyan 2013-cü ildə Tbilisidə özünü Azərbaycan xüsusi xidmətinin əməkdaşı kimi təqdim edən Arman tərəfindən ələ alınıb.

D.Qoroyan qohumu K.Qumaşyanın Armanla tanış olduğunu bilirdi. Söhbətin dövlətə xəyanətdən getdiyini bilən qız bu barədə hüquq-mühafizə orqanlarına məlumat verməyib.

Rafik və Sergey Papoyanlara, Karina Qumaşyan 299-cu maddənin 1-ci hissəsi, D.Qoroyana 335-ci maddənin 1-ci hissəsi ilə ittiham irəli sürülüb. R.Papoyan və K.Qumaşyan həbs edilib, S.Papoyan və D.Qoroyan ölkədən çıxmamaq haqda iltizam ilə buraxılıblar.-02D-