Etirazçı şəhid ailəsinin üzvü həbs edilib

Bakı/12.12.18/Turan: Ötən gün şəhid ailələrinin etiraz aksiyası zamanı saxlanılan Toğrul Qocayev həmin gün 30 sutka həbs edilib. Bu barədə onun doğmaları məlumat veriblər. O, İnzibati Xətalar Məcəlləsinin 535.1-ci maddəsi (polisin qanuni tələblərinə tabe olmamaq) ilə təqsirli sayılıb.

Lakin aksiyanın digər iştirakçılarının sözlərinə görə, şəhid ailələrinin üzvləri Prezident Administrasiyasına yaxınlaşan zaman T.Qocayevi iki mülki geyimli şəxs saxlayaraq avtomobilə əyləşdirib və naməlum istiqamətə aparıb.

Şəhid ailələri polisin hərəkətindən və T.Qocayevin həbsindən hiddətlənib. Onlar artıq iki aydır ki, müxtəlif dövlət qurumlarınım qarşısında aksiya keçirərək həlak olan hərbçilərə görə müəyyən edilmiş birdəfəlik kompensasiyanın ödənilməsini tələb edirlər.

Xatırladaq ki, bu ilin yazında prezident İlham Əliyev 1991-1997-ci illərdə Azərbaycanın ərazü bütövlüyü uğrunda döyüşlərdə həlak olan və itkin düşənlərin ailələrinə 11 manat məbləğində birdəfəlik kompensasiyanın ödənilməsi barədə sərəncam verib.

Kompensasiyaların ödənilməsinə oktyabrın 9-dan başlanılıb. Lakin ailələrin bir çoxuna verilməyib və deyiblər ki, onlar bu vəsaiti əvvəllər alıblar. Narazı vətəndaşlara məhkəməyə müraciət etmək tövsiyə olunub. Ancaq məhkəməyə müraciət etmək üçün mərhumun ailəsi dövlət orqanlarından rəsmi imtina almalıdır ki, yazılı sənədi də vermirlər.

"Azərsığorta" Dövlət Şirkətindən bildirirlər ki, 1999-cı illərdə hərbçilərin icbari sığortalanması çərçivəsində bəzi ailələrə kompensasiya verilib. O zamankı kompensasiyanın məbləği denominasiya edilmiş 50000-200000 manat idi ki, indiki ekvivalentdə 10-40 manat edir. -06D-