Fəal həbs olunub (YENİLƏNİB)

İyunun 1-də Təhsil Nazirliyinə “Ödənişi ləğv et! Və “İmtahanları ləğv et!” şüarı altında petisiya təqdim etməyə çalışan “Tələbə tələbi” Hərəkatın rəhbəri Rüstəm İsmayılbəyli inzibati qaydada həbs olunub. 

Bu barədə AzadlıqRadiosuna Hərəkatdan məlimat verilib. 

Məlumata görə, İsmayılbəyli İnzibati Xətalar Məcəlləsinin 211-ci və 535.1-ci maddələrin pozmasında təqsirli bilinib. Nərimanov Rayon Məhkəməsinin qərarı ilə o, 15 sutka müddətinə həbs olunub.

*   *   *

2020 İyun 01 (Bazar ertəsi) 20:54:27

Təhsil Nazirliyinin qarşısında keçirilən aksiyanın yeddi iştirakçısı məsuliyyətə cəlb olunub (yenilənib)

Bakı/01.0620/Turan: İyunun 1-də Təhsil Nazirliyinin qarşısında aksiyaya cəhd zamanı 7 nəfər saxlanılıb. Bu barədə bazar ertəsi axşam Bakı Şəhər Baş Polis İdarəsi bildirib.

Mənbənin məlumatına görə, 6 nəfərin barəsində İnzibati Xətalar Məcəlləsinin 211-ci (karantin rejiminin pozulması) maddəsi ilə inzibati hüquqpozma haqqında protokol tərtib edilib.

Yeddinci şəxsin barəsində materiallar rayon məhkəməsinə göndərilib, - məlumatda bildirilir.-16D-

*   *   *

2020 İyun 01 (Bazar ertəsi) 17:52:36

Təhsil Nazirliyinin qarşısında tələbələr və fəallar saxlanılıb

Bakı/01.06.20/ Turan: “Tələbənin tələbi” layihəsinin iştirakçıları iyunun 1-də Təhsil Nazirliyinə “Ödənişi ləğv et! Və “İmtahanları ləğv et!” şüarı altında petisiya təqdim etməyə çalışıblar. Onlar təhsil haqqının baha olmasına etiraz ediblər.

Müraciəti təqdim etmək üçün gələnlər Rüstəm İsmayılbəyli, Allahverdi Həsənov və Zərifə Novruz nazirlik rəsmilərinin onları orada qəbul edəcəyi adı ilə  polis tərəfindən Təhsil Nazirliyinin Muzeyinin binasına aparılıblar. Bir müddət sonra binadan çıxan Zərifə Novruz bildirib ki, fəalların qurumun nümayəndələri ilə görüşündən sonra binadan çıxarkən R.İsmayılbəyli saxlanılıb və naməlum istiqamətə aparılıb.

Polis görüşün digər iştirakçısı A.Həsənovu və aksiyanı dəstəkləməyə gələn Bakı Dövlət Universitetinin tələbəsi Rəhim Əhmədov, fəal Vüqar Mirzəbəyev, İlham Rəsul, Rəhim Məmmədov və Qiyas İbrahimovu saxlayaraq aparıb.

Polis Təhsil Nazirliyinin qarşısında toplaşanlardan sosial məsafəyə əməl etməyi və karantin rejimini pozmamağı tələb edib. Eyni zamanda mülki geyimli şəxs jurnalist Fərqanə Novruzovaya təzyiq göstərib.

Bakı Baş Polis İdarəsinin mətbuat xidmətinin rəhbəri Elşad Hacıyev Turan-a bildirib ki, məsələ araşdırıldıqdan sonra məlumat verə biləcək.- 21C-